Fögnum þeim sem þora!

Frá árinu 2010 hefur árlegur fjöldi nýskráðra fyrirtækja hér á landi vaxið úr 1.600 í 2.600. Á bak við nýtt fyrirtæki er frumkvöðull með hugmynd og framtíðarsýn. Fyrir hann er stóra verkefnið næstu árin að byggja upp jákvæð tengsl við fjölda aðila, jafnt bein viðskiptatengsl og hugrenningatengsl sem kalla má ímynd. Úr þessum tengslum er markmiðið að búa til heildstætt vörumerki sem heldur áfram að þroskast og dafna.

Hvort sem fyrirtækið er byggt á hæfileikum eins manns til að veita öðrum tiltekna þjónustu eða er ætlað að sigra heiminn með nýstárlegri vöru, þá er áskorunin ávallt hin sama – að byggja upp vörumerki í vitund viðskiptavina, samstarfsaðila og fjárfesta þar sem gagnkvæmt traust ríkir. Því traust skiptir lykilmáli við val á vörumerki og við hverja við eigum viðskipti.

Sérstaða vörumerkisins, saga þess, þarf að vera áhugaverð og vel skilgreind fyrir markhópinn og það fjármagn sem fyrirtækið hefur yfir að ráða. Hvernig er hægt að hámarka nýtingu fjármagns og tíma til að byggja upp fyrirtæki með sterka innviði og mannauð, sem á í uppbyggilegu og virku gagnkvæmu samtali við samstarfsaðila á réttum viðskiptasvæðum, með vel skilgreindar sölu-, markaðs- og flutningsleiðir að teknu tilliti til framlegðar án þess að fara af leið? Á hverjum degi standa þessi nýju fyrirtæki frammi fyrir þessari spurningu.

Sterkir hluthafar mikilvægir

Það er mjög mikilvægt fyrir lítið fyrirtæki að hafa sterka hluthafa með sameiginlega sýn og þekkingu á því sviði sem fyrirtækið starfar til að ná þessum árangri. En ekki síður að fjárfestarnir standi þétt við bakið á starfsfólkinu við að taka öll litlu og flóknu skrefin sem liggja að baki því að byggja upp heildstætt vörumerki. Því skiptir lykilmáli rétt samsetning hluthafa og fyrirtækja. Þekking íslenskra fjárfesta og áhugi á að byggja upp sprotafyrirtæki hefur vaxið gríðarlega á síðustu árum. Því ber að fagna. Án áhættufjármagns og þekkingar á sprotaumhverfi myndu mörg þessara fyrirtækja enn vera hugmynd á borði frumkvöðulsins.

Einna mikilvægast er þó að fyrirtækið sjálft og einstaklingarnir á bak við það hafi trú á sjálfum sér og vörumerkinu, læri stöðugt af þeim mistökum sem þeir munu gera og einkum að þeir fagni litlu sigrunum á þeirri leið að búa til arðsamt fyrirtæki, hvort sem því er ætlað smátt eða risastórt hlutverk.

Á bak við hvert og eitt þessara fyrirtækja og vörumerkja eru frumkvöðlar, stjórnendur, starfsmenn og fjárfestar. Allir eru að taka áhættu, faglega og fjárhagslega. Flestir eru að búa til verðmæti. Að fá hugmynd, stofna fyrirtæki á bak við hugmyndina, byggja upp vel skilgreint vörumerki og í kjölfarið búa til verðmæti krefst hugrekkis, tíma, eldmóðs, áræðni og fjármagns. Fögnum því þeim sem þora!

 

Höfundur er viðskiptafræðingur.