Ertu leiðtogi af gamla skólanum?

Hvort sem þú ert að leiða teymi, deild, heilt fyrirtæki eða stofnun, þá hefur þú alltaf val. Þú getur valið um að vera leiðtogi af gamla eða nýja skólanum. Hvort ert þú?

Upp úr síðustu aldamótum fór að bera á nýjum leiðtogaáherslum, fræðum sem kallast „Feminine Valued Leadership“ og mætti snara yfir á íslensku sem „gildi kvenlægrar stjórnunar“ þar sem hugtök eins og samstarf, samvinna og samsköpun eru höfð að leiðarljósi.

Bæði viðskipta- og stjórnmála­umhverfið var upphaflega skilgreint af körlum – fyrir karla – og hefur það frá upphafi snúist um leiðir og aðferðir sem karlar hafa fundið sig í. Konur hafa til þessa dags þurft að laga sig að þessu karllæga umhverfi til þess að vera virtar og metnar að verðleikum.

Það ætti því ekki að koma neinum á óvart að leiðtoginn af „gamla skólanum“ er stjórnandinn sem stýrist af hinum svokölluðu karllægu gildum. Hugtökum eins og hugrekki, einurð, fastur fyrir, styrkur, sjálfstæði og stefnufesta. Hin svokölluðu kvenlægu gildi sem talað er um í leiðtogafræðunum eru: tilfinningagreind, gagnvirk hlustun, samræður, hluttekning, skilningur, samstarf, samvinna, samsköpun í verkefnum og áherslum.

Rithöfundurinn Daniel Goldman sem skrifaði metsölubókina „Emot­ional Intelligence“ sýndi fram á að leiðtoginn sem nær bestum árangri, er leiðtogi sem hefur 85 prósent tilfinningagreind. Slíkur leiðtogi stjórnar út frá hinum kvenlægu gildum með lítilræði (15 prósent) af hinum svokölluðu karlægum gildum. Bæði konur og karlar stjórnast bæði af karlægum og kvenlegum gildum og spurningin er bara hvernig blandan lítur út og hvort viðkomandi sé opinn fyrir að efla hin kvenlægu gildi hjá sjálfum sér.

Sem stjórnendaþjálfi á alþjóðamarkaði síðastliðin tíu ár hef ég tekið eftir því að alltof stór hópur leiðtoga telur sér trú um að þeir séu að stjórna sem leiðtogi af nýja skólanum. En þegar grannt er skoðað kemur í ljós að þeir eru fastir í formi gamalla gilda.

Góðu fréttirnar eru þær, að þegar stjórnandi eins og þú verður meðvituð/aður um eigin venjur, þá er hægt að fara í breytingar í þá átt sem gefa þér og teyminu þínu meiri ánægju, árangur og dýpri tengingu við tilgang og framgang fyrirtækisins. Ert þú enn þá að vinna út frá eldgömlum karllægum gildum?

Greinin birtist fyrst í Markaðnum, fylgiriti Fréttablaðsins um viðskipti og efnahagsmál.