Ronaldo eignast tvíbura

Fótboltamaðurinn Cristiano Ronaldo er orðinn faðir á ný með hjálp staðgöngumóður.

Portúgalski miðillinn SIC greinir frá þessu og í frétt á vef SIC segir að tvíburarnir Eva og Mateo hafi fæðst á fimmtudagskvöld en Ronaldo hefur þó enn ekki sjálfur staðfest gleðitíðindin.

Breski miðillinn The Sun greindi frá því í mars síðastliðnum að Ronaldo ætti von á tvíburasonum með hjálp staðgöngumóður í Bandaríjunum.

Fyrir á Ronaldo einn son, Cristiano Ronaldo Jr, sem er nú orðinn sex ára. Hann er í sambandi með spænsku fyrirsætunni Georginu Rodriguez.