Sjúkrahúsin á Akureyri og Akranesi verða nýtt til að stytta biðlista

Sjúkrahúsin á Akureyri og Akranesi verða nýtt til að vinna á biðlistum á Landspítalanum segir heilbrigðisráðherra. Hátt í sjö hundruð manns bíða eftir liðskiptiaðgerð.

Um miðja síðustu viku biðu 658 sjúklingar eftir því að komast í liðskiptiaðgerð á Landspítalanum. Sjötíu nýir sjúklingar bætast við biðlista eftir liðskiptiaðgerð í hverjum mánuði. Ekki er útlit fyrir að það breytist í bráð vegna hækkandi lífaldurs þjóðarinnar. Á sama tíma geta þeir sem hafa beðið 90 daga eða lengur eftir aðgerð leitað sér lækninga á sjúkrahúsi erlendis á kostnað skattgreiðenda. Þetta eru réttindi sem voru leidd í lög hér á landi á grundvelli svokallaðrar biðlistatilskipunar Evrópusambandsins. 

Innbyggði ójöfnuðurinn sem felst í þessu er sá að þeir sem geta ekki lagt út fyrir ferðalaginu út og öðrum kostnaði komast ekki í þessar aðgerðir í útlöndum því sækja þarf sérstaklega um endurgreiðslu á eyðublaði hjá Sjúkratryggingum Íslands.

Katrín Jakobsdóttir formaður Vinstri grænna spurði Óttarr Proppé heilbrigðisráðherra út í biðlistana í óundirbúnum fyrirspurnum á Alþingi í dag.

„Einfaldasta leiðin til að stytta biðlistana er að styðja við þau sjúkrahús sem ráða við þær aðgerðir þar sem langur biðlisti er fyrir hendi. Mig langar að spyrja hæstvirtan ráðherra hvort hann sé ekki sammála mér um að þetta sé einfaldasta leiðin til að stytta biðlista, styðja við Landspítalnn á Akureyri, sjúkrahúsið á Akureyri og þau fjórðungssjúkrahús þar sem hægt er að ráðast í slíkar aðgerðir ef fjármagn fylgir?“ spurði Katrín.

„Ég held að við háttvirtur þingmaður séum að mörgu leyti sammála. Það er unnið á biðlistum fyrst og fremst með fjármagni. Þegar við erum að tala um biðlista erum við fyrst og fremst að tala um valkvæðar aðgerðir, ekki bráðaaðgerðir,“ sagði Óttarr Proppé heilbrigðisráðherra. Hann rakti að ágætlega gengi að vinna á biðlistum. Stór hluti vinnunnar við styttingu biðlista fælist í stuðningi við þær heilbrigðisstofnanir sem gætu sinnt aðgerðum. 

„Í ár erum við að horfa fyrst og fremst á Landspítalann, við erum að horfa á sjúkrahúsið á Akureyri og sjúkrahúsið á Akranesi þ.e. Heilbrigðisstofnun Vesturlands og við erum einnig að horfa á möguleika til þess að nýta aðstöðu og mannskap á öðrum heilbrigðisstofnunum með stuðningi Landspítalans ef til þarf,“ sagði Óttarr. 

Í biðlistaátakinu sem hófst í fyrra og var áætlað að stæði yfir í þrjú ár stendur til að verja 840 milljónum króna árlega í að stytta biðlista eftir þessum valkvæðu aðgerðum. Á sama tíma voru rúmlega 2 milljarðar króna settir í aðgerðatúrisma á fjárlögum þessa árs fyrir þá sem hafa beðið í meira en 90 daga en hér er um að ræða aðgerðir erlendis sem greiddar eru af Sjúkratryggingum Íslands og nefndar voru framar. 

Í þeim svörum sem fréttastofan hefur undir höndum frá Landspítalanum um biðlista eftir liðskiptiaðgerðum og bárust í síðustu viku er ekkert minnst á aðgerðir á öðrum sjúkrahúsum en Landspítalanum til að stytta biðlista á spítalanum. Hins vegar var fyrst greint frá þessum áformum á vef velferðarráðuneytisins hinn 21. mars síðastliðinn. 

Fréttin var uppfærð 16. maí kl. 9:40 til að bæta við síðasta málslið hennar.