HB Statz: FH á þrjá bestu leikmennina í úrslitaeinvíginu til þessa

Deildarmeistarar FH og bikarmeistarar Vals eru þessa daganna að berjast um Íslandsmeistaratitil karla í úrslitaeinvígi Olís-deildarinnar og staðan er jöfn 1-1. Þriðji leikurinn er í Kaplakrikanum í kvöld.

Báðir leikirnir hafa unnist á útivelli því Valur vann fyrst í Kaplakrika en FH-ingar svöruðu með því að vinna á Hlíðarenda. Leikurinn í kvöld hefst klukkan 20.00 og liðið sem vinnur hann vantar aðeins einn sigur í viðbót til þess að tryggja sér Íslandsmeistaratitilinn.

HB Statz hefur fylgst vel með úrslitaeinvíginu og tekið saman sína glæsilegu tölfræði í báðum leikjum. Nú er hægt að finna samantekt á frammistöðu leikmanna í úrslitaeinvíginu til þessa.

Auk þess að taka saman hina ýmsu tölfræði þá reiknar HB Statz einnig út einkunn leikmanna út frá tölunum.

Það vekur athygli að FH-ingar eiga þrjá bestu leikmennina, þrjá bestu sóknarmennina og tvo bestu varnarmennina í einvíginu til þessa.

Hinn sautján ára gamli Gísli Þorgeir Kristjánsson í FH-liðinu er langhæstur, bæði í heildareinkunn (9,3) sem og bara einkunn fyrir sóknarleik (9,9). Gísli hefur skorað 8,0 mörk og gefið 2,5 stoðsendingar að meðaltali í leik um leið hefur hann aðeins tapað 0,5 boltum og nýtt 76 prósent skota sinna.

Einar Rafn Eiðsson er í öðru sæti á báðum listum en hann er með 4,0 mörk i leik og 57 prósent skotnýtingu. Ásbjörn Friðriksson er síðan þriðji yfir sóknarleikinn með 4,5 mörk í leik, 3,5 stoðsendingar í leik og 53 prósent skotnýtingu.  Ásbjörn og Einar Rafn eru hinsvegar jafnir í öðru sæti á listanum yfir heildarframmistöðu. Efstur Valsmanna er leikstjórnandinn Anton Rúnarsson.

FH-ingurinn Ágúst Birgisson er besti varnarmaður úrslitaeinvígisins til þessa en hann hefur meðal annars náð 7,5 löglegum stöðvunum að meðaltali í leik. Liðsfélagi hans Arnar Freyr Ársælsson er síðan með næsthæstu meðaleinkunnina fyrir varnarleik sinn.

Besti markvörðurinn er Valsmaðurinn Sigurður Ingiberg Ólafsson en hann hefur varið 7,5 skot að meðaltali í leik og 35 prósent skot sem hafa komið á hann. Birkir Fannar Bragason hjá FH er með næsthæstu meðaleinkunn markvarðanna en hann er með 6,0 skot varin að meðaltali og hefur tekið 50 prósent skota sem hafa komið á hann.



Besta meðaleinkunn leikmanna:

1. Gísli Þorgeir Kristjánsson, FH 9,3

2. Einar Rafn Eiðsson, FH 7,5

2. Ásbjörn Friðriksson, FH 7,5

4. Anton Rúnarsson, Val 7,0

5. Josip Juric Gric, Val 6,9

6. Ólafur Ægir Ólafsson, Val 6,8

6. Ágúst Birgisson, FH 6,8

8. Óðinn Þór Ríkharðsson, FH 6,6

9. Orri Freyr Gíslason, Val 6,4

9. Ýmir Örn Gíslason, Val 6,4

Besti sóknarmaðurinn:

1. Gísli Þorgeir Kristjánsson, FH 9,9

2. Einar Rafn Eiðsson, FH 8,2

3. Ásbjörn Friðriksson, FH 8,0

4. Anton Rúnarsson, Val 7,9

5. Josip Juric Gric, Val 7,5

6. Ólafur Ægir Ólafsson, Val 7,3

6. Óðinn Þór Ríkharðsson, FH 7,3

Besti varnarmaðurinn:

1. Ágúst Birgisson, FH 8,2

2. Arnar Freyr Ársælsson, FH 7,8

3. Ólafur Ægir Ólafsson, Val 7,2

3. Alexander Örn Júlíusson, Val 7,2

3. Ýmir Örn Gíslason, Val 7,2

6. Orri Freyr Gíslason, Val 6,8

7. Jóhann Karl Reynisson, FH 6,7

Besti markvörðurinn:

1. Sigurður Ingiberg Ólafsson, Val 7,5

2. Birkir Fannar Bragason, FH 7,2

3. Ágúst Elí Björgvinsson, FH 6,8

4. Hlynur Morthens, Val 6,6

Hér fyrir neðan má sjá meira af tölfræðinni hjá HB Statz.