Arnór Þór markahæstur í bráðnauðsynlegum sigri

Arnór Þór Gunnarsson var markahæstur hjá Bergischer þegar liðið vann afar mikilvægan sigur á Göppingen, 32-26, í þýsku úrvalsdeildinni í handbolta í kvöld. Bergischer er nú aðeins einu stigi frá öruggu sæti þegar níu umferðum er ólokið.

Arnór Þór skoraði níu mörk úr aðeins 11 skotum. Þrjú af mörkum hans komu af vítalínunni. Björgvin Gústavsson ver mark Bergischer.

Sigtryggur Rúnarsson skoraði sjö mörk og var markahæstur í 33-25 sigri Aue á Konstanz í B-deildinni. Auk þess að skora sjö mörk gaf Sigtryggur fimm stoðsendingar. Frændi hans, Árni Þór Sigtryggsson, skoraði fimm mörk og gaf þrjár stoðsendingar. Bjarki Már Gunnarsson skoraði eitt mark fyrir Aue.

Oddur Gretarsson skoraði sex mörk fyrir Emsdetten í 29-25 tapi fyrir Ludwigshafen-Friesenheim.

Ólafur Bjarki Ragnarsson skoraði þrjú mörk í naumum sigri Eisenach á Essen, 26-27.