Systkini voru marga mánuði að losna við handónýtan leigjanda úr íbúðinni sinni

Vanræki leigjandi leigusamning getur það tekið marga mánuði fyrir leigusala að losa fasteign sína. Að mati formanns Húseigendafélagsins varð afturför þegar útburðarmál voru færð frá borgarfógeta til hinna nýstofnuðu héraðsdóma árið 1992.

„Við systir mín erfðum íbúð eftir föður okkar. Síðasta sumar ákváðum við að setja hana í útleigu,“ segir Daníel Arnar Tómasson. Þau völdu mann úr hópi mögulegra leigjenda. Ekki var farið fram á tryggingu þar sem leigjandinn bauðst til þess að skipta um flísar og parket í íbúðinni á sinn kostnað. Mánuðirnir liðu og aldrei bárust greiðslur vegna leigunnar. 

„Við gáfum honum þriggja mánaða séns áður en við hófum ferlið við að koma honum út,“ segir Daníel. Það ferli hófst í nóvember. Systkinin virtu alla lögmælta fresti sem nauðsynlegt er við riftun á leigusamningi, fóru með útburðarmálið fyrir héraðsdóm og fengu íbúðina aftur í gær.

„Þegar við komum í gær þurftum við að fá lásasmið til að opna og skipta um lás. Það sem tók á móti okkur var hálfkláruð og léleg vinna við gólfið og veggina. Þarna var líka hvítt efni, annaðhvort kókaín eða amfetamín, sprautur, sterar og einhverjar töflur,“ segir Daníel.

Á þeim tíma sem leigjandinn var í íbúðinni, sem spannar rúma sex mánuði, fengu Daníel og Ásta rúmar 100 þúsund krónur frá manninum. Vangreidd leiga nemur um milljón. Þá er ótalinn kostnaður við að fara með málið fyrir dóm og viðgerðarkostnaður á íbúðinni.

„Það er oft með útburðarmál að leigjandi lætur ekki ná í sig. Þá þarf að boða hann aftur. Þetta ferli getur tekið nokkra mánuði og upp í hálft ár,“ segir Sigurður H. Guðjónsson, formaður Húseigendafélagsins. „Hér áður fóru svona mál fyrir borgarfógeta en ekki héraðsdóm. Þá tóku þau tvær til þrjár vikur.“

Sigurður telur að það sé ekki við húsaleigulögin að sakast. Þau séu afgerandi og skýr. Vandamálið sé tengt réttarfarinu þegar málið fer fyrir dóm.

„Sjaldnast eru þetta mál þar sem er tekið til varna. Þrátt fyrir það tekur þetta óralangan tíma fyrir dómi. Nái leigjandinn að smjúga undan stefnuvottum þá getur það tafið málið svo vikum skiptir,“ segir Sigurður. 

Fréttin birtist fyrst í Fréttablaðinu.