Innlent

Trommarar Íslands berja í borðið og segja þá í Harmageddon illa upplýsta

Jakob Bjarnar skrifar
Trommarar senda frá sér yfirlýsingu þar sem segir að útvarpsmennirnir séu illa upplýstir. Frosti og Máni furða sig á yfirlýsingunni.
Trommarar senda frá sér yfirlýsingu þar sem segir að útvarpsmennirnir séu illa upplýstir. Frosti og Máni furða sig á yfirlýsingunni.

Trommarar Íslands hafa sent frá sér yfirlýsingu þar sem umdeild ummæli Frosta Logasonar í Harmageddon eru fordæmd. Trommararnir eru 236 tölu, þar af fjórar konur, birta yfirlýsinguna á trommari.is Þar segir að það að tromma sé ekki karlmannlegt heldur einfaldlega töff.

Yfirlýsingin kemur í kjölfar hatrammra umræðna vegna umræðu í Harmageddon á föstudaginn þar sem þeir tóku íslensku tónlistarverðlaunin til umfjöllunar. Frosti taldi að Hildur Kristín Stefánsdóttir, sem hlaut verðlaun fyrir popplag ársins, hafi hlotið þau vegna þess að hún er kona. Og þá sagði Frosti að hann teldi karla betur til þess fallna að tromma í þunga- og dauðarokkshljómsveitum.

Illa upplýstir útvarpsmenn
„Vegna nýlegra ummæla fjölmiðlamanna um konur og trommuleik vilja trommarar þessa lands árétta að trommuleikur er ekkert karllægari en hver annar hljóðfæraleikur. Hann krefst fyrst og fremst hæfileika, æfingar og ástundunar til að ná upp tæknilegri getu,“ segja trommararnir í yfirlýsingu sinni, halda svo áfram og víkja nú máli sinu að útvarpsmönnunum Mána Péturssyni og Frosta Logasyni, umsjónarmönnum þáttarins Harmageddon:

„Það er kannski skiljanlegt að útvarpsmenn setji fram svona órökstuddar fullyrðingar til að ná athygli landans en það er ekkert töff við það að vera illa upplýstur. Við getum fullvissað landsmenn um að þessar fullyrðingar eiga ekki við nein rök að styðjast og eru því tómt kjaftæði. Það er hins vegar algjör töffaraskapur og mikil skemmtun að tromma og öllum gefið sem hafa til þess hæfileika, burtséð frá kyni.“

Einungis fjórar konur á listanum
Vísir leitaði viðbragða þeirra Mána og Frosta og þeir vissu varla hvaðan á sig stóð veðrið. Þeir furða sig á því að sjálfir sendu þeir út yfirlýsingu um málið og að hún sé nákvæmlega sama efnis og yfirlýsing trommara.

Þeir benda á að af 236 sem skrifa undir yfirlýsinguna eru 232 karl. Þannig að það sanni náttúrlega svo ekki verði um villst að trommuleikur getur alls ekki talist karllægt fyrirbæri.

„Í fyrsta lagi voru það ekki okkar orð að konur gætu ekki trommað. Og það eru auðvitað augljós líkindi með þessari yfirlýsingu og þeirri sem við sendum frá okkur í gær, þannig kemur þetta kannski ekki á óvart. En það slær mann sannarlega utanundir að sjá að á vel á 3. hundruð manna lista eru einungis fjórar konur. Við vorum auðvitað með ákveðnar hugmyndir um hvernig í pottinn væri búið í þessum málum en gerðum okkur enga grein fyrir að ástandið væri svona slæmt.“


Tengdar fréttir

Umburðarlyndi stríðandi skoðana

Skoðanir eru helsta forsenda rökræðna. Rökræður nýtast okkur til þess að betrumbæta samfélög á lýðræðislegum grundvelli.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.