Upp úr sauð á milli tveggja kvenna í búningsklefa World Class á Seltjarnarnesi í hádeginu í dag. Ástæðan var sú að önnur konan tók sjálfu af sér í spegli búningsklefans en hin vildi að konan eyddi myndinni.
Isabella Ósk Másdóttir var í sturtu þegar myndatakan sjálf fór fram en varð vitni að samskiptum kvennanna í klefanum í kjölfarið. Hún segir konuna hafa fengið að sjá myndina og hún hafi verið inni á henni, fáklædd. Því hafi hún beðið konuna sem tók myndina að eyða henni en konan neitaði að verða við þeirri beiðni.
„Konan var rosalega sár,“ segir Isabella en konurnar hafi farið í afgreiðsluna og rætt við starfsfólk. Reynt hafi verið að afgreiða málið en konan staðið fast á því að hún ætlaði ekki að eyða myndinni.
Það hafi séð sig knúið til að kalla á lögreglu sem mætti skömmu síðar. Var verið að taka skýrslu af konunni sem tók myndina þegar Isabella yfirgaf svæðið.
Rétt er að taka fram að myndatökur í búningsklefum sundlauga og líkamsræktarstöðva eru með öllu óheimilar.
Ekki náðist í lögreglu við vinnslu fréttarinnar.
Tók sjálfu í kvennaklefanum í World Class og neitaði að eyða henni
