Klaufaleg slagsmál æfð í hringnum

Það gekk glimrandi vel með Gunnari. Ég var mjög stressaður á leiðinni í Mjölni fyrst þegar ég hitti hann. Hugsaði hvað ertu að pæla? Fara að slást við Gunnar Nelson. En hann er náttúrulega svo mikið gæðablóð. Mikill fagmaður og það var mjög lærdómsríkt að vera með honum í hringnum. Hann er svo yfirvegaður og lætur allt líta út fyrir að vera svo auðvelt. Ekki það að það hefur örugglega verið mjög auðvelt fyrir hann að standa á móti mér,“ segir leikarinn Guðjón Davíð Karlsson, eða Gói eins og flest allir þekkja hann, en hann fékk sjálfan Gunnar Nelson til þess að þjálfa sig upp í bardagaatriði í leikritinu Óþelló sem sýnt er í Þjóðleikhúsinu um þessar mundir.

Spurður út í hvernig bardaga­atriðið er í sýningunni segir Gói það vera ekta klaufaleg götuslagsmál.

„Til að leika klaufaleg slagsmál þá þarf maður að vera vel æfður til að koma í veg fyrir að einhver slasist. Það er náttúrulega einn bardagasnillingur hér á landi og það er Gunnar Nelson,“ segir Gói og bætir við að Gunnar hafi verið meira en til í að aðstoða sig við atriðið og gefa sér góða punkta.

Áður en Gói fór í þjálfun til Gunnars, varð hann móður og náði varla að segja fram textann sinn.

„Ég fann svo út úr því að í slagsmálunum gleymdi ég að anda. Sem er frekar bagalegt. Þannig að ég kom varla upp orði. Gunnar hjálpaði mér að muna eftir því að anda. Þetta hljómar náttúrulega fáránlega. En það er merkilegt hvað eðlilegustu hlutir eins og að anda geta vafist fyrir manni þegar maður er að gera eitthvað nýtt,“ segir Gói.

Væri til í að æfa meira með Gunnari

„Ég væri sko alveg til í það. En ég held að það sé langt í að ég fari að keppa í þessu. Held ég haldi mig bara við leikinn.“

Eftir nokkrar æfingar með í Mjölni fann Gói mikinn mun á bardagasenunni í sýningunni.

„Það er svo skemmtilegt að finna muninn á senunni eftir að hafa farið yfir þessi grunnatriði með Gunnari. Þá kemur bara miklu meira öryggi í þetta allt saman. Það er bara ekkert mál að leika senuna núna. Nú hugsa ég líka, var ég í alvöru móður eftir þessa senu? Það er bara svo mikið atriði að vita hvað maður er að gera. Það skiptir gríðarlega miklu máli,“ segir Gói. 

Hér að neðan má sjá myndband af þeim félögunum í hringnum.