Banaslys í svefnskála á Reykjanesi

Einn maður lést og annar hefur verið fluttur á sjúkrahús eftir slys sem átti sér stað hjá fiskvinnslufyrirtækinu Háteigur á Reykjanesi í nótt. Mbl.is greindi fyrst frá.

Í samtali við Vísi segir Kristinn Tómasson, yfirlæknir Vinnueftirlitsins, að mennirnir tveir hafi dvalið í svefnskála sem er tengdur verksmiðjunni og er talið líklegt að gufur hafi borist á milli. Vinnueftirlitið fékk tilkynningu um atvikið um klukkan átta í morgun.

Kristinn segir að sterk og annarleg lykt sé inn í verksmiðjunni en bæði lögregla og starfsmenn Vinnueftirlitsins eru á vettvangi að rannsaka tildrög slyssins.

Starfsemi verksmiðjunnar hefur verið stöðvuð auk vinnu á svæðinu í kring.

Uppfært: 

Upphaflega var greint frá því að fyrirtækið sem um ræddi væri Haustak. Það hefur nú verið leiðrétt.