Þegar besti vinur Baldvins Z kom út úr skápnum: „Enduðum bara í sleik og fögnuðum“

Hjartasteinn er fyrsta kvikmynd leikstjórans Guðmundar Arnars Guðmundssonar í fullri lengd en kvikmyndin hefur sópað til sín alþjóðleg verðlaun undanfarna mánuði. Hjartasteinn fjallar um sterka vináttu tveggja drengja sem eru að taka sín fyrstu skref inn í unglingsárin og uppgötva ástina.

Tökur fóru fram haustið 2015 á Borgarfirði eystri, Seyðisfirði, í Vopnafirði og Dyrhólaey. Sérstök forsýning verður í Háskólabíói í kvöld og verður myndin frumsýnd 13. janúar. Framleiðendur myndarinnar hvetja Íslendinga til að segja frá æskuminningum sínum á Twitter undir kassamerkinu #hjartasteinn eins og sjá má hér að neðan.

Kvikmynd á eflaust eftir að vekja upp margar æskuminningar hjá áhorfendum og að því tilefni fengu framleiðendur myndarinnar til sín nokkra þjóðþekkta einstaklinga til að rifja upp sínar æskuminningar en að þessu sinni er komið að leikstjóranum Baldvini Z sem segir frá eftirminnilegu atviki úr æsku.

„Það er ótrúlegt að hugsa til þess að einn af mínum bestu æskuvinum sé ég nánast ekkert í dag en við vorum saman upp á dag í tíu ár,“ segir Baldvin og bætir við að þeir hafi hreinlega gert allt saman og uppgötvað allt saman.

„Stelpur, bjórinn og sígaretturnar, allt sem unglingurinn allstaðar gerir. Hann tók rosalega stórt skref á unglingsaldri þegar hann sagði mér frá því að hann væri samkynhneigður. Ég man hvað það var erfitt fyrir hann að segja mér þetta og ég var svona einn af þeim fyrstu sem hann sagði. Tíðarandinn var allt öðruvísi á þessum tíma og þetta eiginlega endaði með því að við vorum í partýi og ég var svo ánægður að heyra þetta, því þetta staðfesti það sem ég hafði hugsað og haldið allan þennan tíma. Ég og hann enduðum bara í sleik og fögnuðum þessu.“