Blásið til tónleika á laugardaginn

Allt sem ég hef gert hefur verið skemmtilegt, það er ótrúlega skemmtilegt að gera sjónvarpsþætti, eins og t.d. Heilsubælið, Spaugstofuna, og fá að skapa skemmtilega karaktera. Laddi 6-tugur og Laddi lengir lífið standa svona helst upp úr,“ segir Þórhallur Sigurðsson, eða Laddi eins og við öll þekkjum hann, spurður út í hvað stendur upp úr á löngum og farsælum ferli.

Laddi ólst upp í Hafnarfirði og lærði húsgagnasmíði í Iðnskólanum í Hafnarfirði. Húsgagnasmíði átti hug hans allan framan af en fljótlega fór Laddi yfir á aðra braut og fór að gera það sem hann gerir best, skemmta þjóðinni. Það er óhætt að segja að Laddi hafi komið víða við á ferli sínum og meðal annars gefið út fjöldann allan af plötum.

„Það er mjög erfitt að gera upp á milli laganna sinna, en Austurstræti kemur strax upp í hugann, svo eru það Búkolla, Sandalar, Mamma og ég, Með nesti og nýja skó, Gibba gibb, Freknótta fótstutta mær, svo öll hin,“ segir Laddi og bætir við að hann hafi því miður ekki töluna á því hversu mörg lög hann hafi samið í gegn um tíðina.

Laddi hefur leikið í mörgum af vinsælustu kvikmyndum okkar Íslendinga og gert fjöldann allan af skemmtiþáttum, til dæmis Heilsubælið, Imbakassann og leikið í Áramótaskaupum. Á ferli hans hafa ófáir karakterar sprottið upp og orðið stór partur af grínsögu Íslendinga sem mun lifa um aldir.

„Það eru nokkrir karakterar sem mér finnst skemmtilegt að leika, til dæmis Eiríkur Fjalar, Skúli rafvirki, Magnús bóndi, og Marteinn Mosdal og Elsa Lund,“ segir hann og bætir við að sennilega sé Eiríkur Fjalar líkastur sér.

Spurður að því hvort fólk hafi tekið einhverjum karakter illa segir Laddi ekki svo vera. „En aftur á móti heyrði ég að Grínverjinn hefði ekki fallið í góðan jarðveg hjá Kínverjum á Íslandi, en ég fann aldrei neitt fyrir því sjálfur.“

Á laugardaginn, daginn eftir afmælisdag Ladda, verður blásið til ferilstónleika í Eldborgarsal Hörpu, þar sem stór hljómsveit stígur á svið með Ladda ásamt gestasöngvurum.

„Þetta eru tónleikar sem byggðir eru á mínum tónlistarferli, og mínum laga- og textasmíðum. Æfingaferlið hefur gengið alveg ljómandi vel. En ég verð þó að játa það að ég er ansi spenntur, en ekki beint stressaður,“ útskýrir Laddi.