David Attenborough snýr aftur í Blue Planet 2

Hinn níræði sjónvarpsmaður, David Attenborough, sem getið hefur sér frægðar fyrir dýralífsþætti sína er hvergi nærri af baki dottinn, þrátt fyrir aldur. Nú er ljóst að hann mun taka þátt í gerð Blue Planet 2 þáttanna, sem framleiddir verða af þeim sömu og gerðu Planet Earth, Life og aðra margrómaða dýralífsþætti á vegum breska ríkissjónvarpsins. BBC greinir frá.

Hinn víðfrægi sjónvarpsmaður mun því birtast aftur á skjám heimsbúa í framhaldsseríu af Blue Planet þáttunum, þar sem hann mun talsetja og útskýra fyrir áhorfendum eins og honum einum er lagið. Gerð þáttanna hefur tekið fjögur ár og var dýralíf myndað í öllum höfum heimsins. 

Margir ættu að gleðjast en hár aldur sjónvarpsmannsins hefur valdið fólki áhyggjum, sumir töldu að hann væri orðinn of gamall til að taka þátt í gerð fleiri þáttasería.

Blue Planet serían einblíndi á dýralíf heimshafanna og kom hún út árið 2001. Það er því ljóst að tækninni hefur fleygt áfram en sem dæmi tókst framleiðendum að festa myndavélar á bak höfrunga og á það að gefa áður óséð skot inn í líf þeirra. 

Þættirnir verða sýndir síðar á þessu ári á BBC. 

For anyone lamenting only 6 Eps in #PlanetEarth2 fear not, we're comin back atchya with Attenborough's #BluePlanet2! https://t.co/hpGJarXfnT

— Chadden Hunter (@ChaddenH) February 20, 2017