Kjartan Henry með sigurmark í Íslendingaslag

Kjartan Henry Finnbogason skoraði sigurmark Horsens í Íslendingaslag í dönsku úrvalsdeildinni í kvöld, þegar Horsens fór í heimsókn til Randers.

Kjartan Henry skoraði framhjá Hannesi Halldórssyni á 47. mínútu og var það eina mark leiksins.

Markið kom úr löngu innkasti, Alexander Ludwig fleytir boltanum áfram á kollinn á Kjartani sem skallar framhjá íslenska landsliðsmarkverðinum.

Horsens er í 3. sæti deildarinnar með 19 stig en Randers er á botninum með aðeins einn sigur í 11 leikjum.