Eldur í gámi við verslunarhúsnæði í miðbænum

Lögreglunni barst tilkynning um eld í miðbæ Reykjavíkur klukkan 06:20 í morgun. Eldur hafði komið upp í gámi og samkvæmt lögreglu skapaðist mikil hætta á vettvangi enda var gámurinn upp við húsvegg.

Gámurinn var staðsettur í porti á bakvið hús á horni Smiðjustígs og Laugavegar þar sem meðal annars veitingastaðurinn Ítalía er til húsa.

Samkvæmt upplýsingum frá slökkviliði var eldurinn ekki mikill en starf á vettvangi tók þó töluverðan tíma. Það má rekja til þess að reykur fór víða, bæði inn í íbúðir og verslunarhúsnæði í kring.