Bale verður frá í mánuð

Gareth Bale meiddist á kálfa í risaleiknum gegn Barcelona og er því eina ferðina enn kominn á meiðslalistann hjá Real Madrid.

Meiðslin sem hann varð fyrir munu halda honum á hliðarlínunni næsta mánuðinn.

Bale var veikur fyrir en hann missti af leiknum gegn Sporting Gijon átta dögum áður vegna kálfameiðsla. Hann virkaði alls ekki tilbúinn í leiknum gegn Barcelona.

Nú er ljóst að Bale mun ekki spila í undanúrslitaleikjunum í Meistaradeildinni gegn Atletico en hann gæti náð úrslitaleiknum komist Real þangað.

Zinedine Zidane, þjálfari Real Madrid, hefur verið talsvert gagnrýndur fyrir að setja Bale í byrjunarliðið gegn Barca en hann sér ekki eftir því.

„Bale sagðist vera fínn og var spenntur fyrir því að spila. Ég sé því ekki eftir neinu. Ég er svekktur fyrir hans hönd því hann vildi spila og taldi sig vera tilbúinn. Það er erfitt að ráða við svona,“ sagði Zidane.