Bundið slitlag á Norðfjarðarflugvelli mun auðvelda sjúkraflug

Nýtt bundið slitlag skiptir sköpum fyrir Norðfjarðarflugvöll sem opnaði aftur í gær eftir þó nokkrar framkvæmdir. Áður hafði verið þar malarbraut en ástand hennar hefur farið versnandi undanfarin ár og því þótti brýnt að setja bundið slitlag til að hægt væri að nota flugvöllinn fyrir sjúkraflug. Þá er einnig stefnt á að bjóða upp á útsýnisflug frá vellinum. Sextíu ár er síðan flugvöllurinn var lagður. Áætlunarflug um völlinn lagðist niður árið 1997. Þetta kemur fram í fréttatilkynningu frá stjórnarráðinu.

Kostnaður við framkvæmdirnar voru 158 milljónir króna og lögðu ríkið og sveitarfélagið saman fjármagn til verksins. Þá fjármögnuðu Fjarðarbyggð, Samvinnufélag útgerðarmanna í Neskaupstað og Síldarvinnslan hf. helming af kostnaði á móti ríkinu. Fjarðarbyggð sagði þetta vera hluti af því að styrkja heilbrigðisþjónustu.

Jón Gunnarsson, samgönguráðherra, klippti á borða við athöfnina í gær og tóku margir menn til máls og fögnuðu breytingunum. Jón Karl Ólafsson, framkvæmdastjóri hjá ISAVIA, Guðjón Hausson forstjóri Heilbrigðisstofnunar Austurlands og Jón Björn Hákonarson ávörpuðu allir samkunduna. Þá stýrði Páll Björgvin Guðmundsson, bæjarstjóri Fjarðabyggðar athöfninni.

Þá var sýnt listflug að lokinni athöfninni og gestir gátu skoðað sjúkraflugvél Mýflugs.