Framsókn, Sjálfstæðismenn og Viðreisn fengu umfjöllun með auglýsingakaupum

Fjölmiðlanefnd er með til athugunar hvort Hringbraut hafi brotið gegn reglum um hlutlægni í fréttum og fréttatengdu efni með umfjöllun sinni um stjórnmálaflokka í aðdraganda kosninga. Verði niðurstaðan sú að Hringbraut hafi farið á svig við reglur liggja sektir við brotunum.

Fyrir kosningar hafði Hringbraut samband við þá stjórnmálaflokka sem samkvæmt skoðanakönnunum þóttu líklegir til að ná manni inn á þing. Samkvæmt upplýsingum Fréttablaðsins stóð hverjum flokki til boða að framleiða fjóra þætti sem hver um sig yrði endursýndur tólf sinnum. Með þáttunum fylgdi auglýsingapakki, með 50% afslætti frá verðskrá Hringbrautar, á 450 þúsund krónur.

Fjölmiðlanefnd barst ábending vegna bréfs sem Hringbraut sendi til stjórnmálaafls sem bauð fram í þingkosningunum. Af því bréfi mátti ráða að Hringbraut myndi framleiða kynningarþætti fyrir þá flokka sem buðu fram í kosningunum ef keyptur yrði auglýsingapakki frá miðlum Hringbrautar.

Þrír flokkar nýttu sér boðið. Framsóknarflokkurinn, Sjálfstæðisflokkurinn og Viðreisn. Aðrir flokkar sem eiga fulltrúa á þingi höfnuðu því að taka þátt og minni framboðum var ekki gefinn kostur á því að taka þátt. Heimildir Fréttablaðsins herma að nokkuð hart hafi verið gengið á eftir þeim flokkum sem höfðu ekki áhuga og þeim meðal annars tjáð að þeir yrðu einu flokkarnir sem yrðu ekki með.

Elfa Ýr Gylfadóttir, framkvæmdastjóri fjölmiðlanefndar, staðfestir að verið sé að kanna hugsanlegt brot Hringbrautar. Þeim flokkum sem nýttu sér boðið ekki var gefinn kostur á að gefa upp hvort þeim hefði staðið slík þátttaka til boða. Að öðru leyti geti nefndin ekki tjáð sig um málið eða mögulega niðurstöðu þess.

„Við höfum sent nefndinni rökstuðning okkar og teljum okkur ekki hafa brotið neinar reglur,“ segir Guðmundur Örn Jóhannsson, sjónvarpsstjóri Hringbrautar. „Við seldum flokkunum ekki þættina heldur seldum við þeim auglýsingar. Síðan stóð þeim til boða að vera með sjónvarpsþátt líkt og tíðkast á ÍNN og N4.“

Aðspurður um hvort stöðin hafi boðið öllum framboðunum tólf þátttöku segir Guðmundur: „Við höfðum þetta ekki lýðræðislegt heldur byggðum við þetta á tölum.