Hefur áhyggjur af misneytingu á vinnumarkaði eftir hrun

„Það er algerlega fáránlegt ef það er svo að það er verið að selja hér aðgang að vinnumarkaðnum. Fólk sem kemur hingað að vinna í óvissu og þekkir ekki til er í sérstaklega viðkvæmri stöðu,“ segir Gylfi Arnbjörnsson, forseti ASÍ, um fimm einstaklinga sem hafa kært ákvörðun lögreglustjórans á Vestfjörðum um að fella niður rannsókn á meintri fjárkúgun vegna starfa þeirra í fiskvinnslu Jakobs Valgeirs í Bolungarvík. Þessir fimm einstaklingar halda því fram að þeir hafi þurft að greiða fé til starfsmanns í fiskvinnslunni til þess að fá vinnu þar og fara fram á að ákvörðun lögreglustjóra verði felld niður. Málið var í rannsókn lögreglu í rúm tvö ár áður en henni var hætt. Meðal gagna í málinu var bréf þar sem eru birt nöfn Pólverja sem sagðir eru hafa greitt vaktstjóra í fiskvinnslu Jakobs Valgeirs eitt þúsund evrur.

Ríkissaksóknari hefur þrjá mánuði til að ákvarða í málinu og mun fara fram á rökstuðning frá lögreglustjóra Vestfjarða.

Gylfi segir lög um vinnumiðlun hér á landi skýr. „Ég tel það óheimilt að starfsfólk greiði fyrir aðgang að vinnumarkaði. Það er ekkert að því að fyrirtæki nýti sér starfsemi starfsmannaleiga og ráðningarfyrirtækja en þar þarf fólk ekki að greiða nokkuð. Svona greiðslur eru þekktur fylgikvilli mansals og illrar meðferðar á starfsfólki. Við fórum í átak á árunum 2004-2007 með auknum fjölda erlendra starfsmanna á vinnumarkaði. Síðan varð hér hrun og minni þátttaka á vinnumarkaði. Nú þegar við erum að komast úr hruninu magnast upp sem aldrei fyrr misneyting á starfsfólki á Íslandi,“ segir Gylfi og segir fulla þörf á því samstarfsátaki sem ASÍ hefur efnt til í samstarfi við aðildarsamtök sín gegn undirboðum á vinnumarkaði og svartri atvinnustarfsemi.