Fjórðungur kvenna í þjónustustörfum orðið fyrir kynferðislegu áreiti af hálfu yfirmanns

Kynferðisleg áreitni hefur meiri áhrif á öryggistilfinningu kvenna en karla og þeim þykir það hafa meiri áhrif að vera áreitt af yfirmanni en vinnufélaga. Um fjórðungur kvenna sem tók þátt í rannsókn á vegum Starfsgreinasambandsins sagði gerandann hafa verið yfirmann. Enginn karlmaður sagðist hafa orðið fyrir áreiti af hendi yfirmanns.

Þetta er á meðal þess sem fram kom í erindi Drífu Snædal, framkvæmdastjóra Starfsgreinasambandsins, á fundi um kynbundna og kynferðislega áreitni á vinnustöðum, á Grand hóteli í dag.

Drífa vísaði í skýrslu Steinunnar Rögnvaldsdóttur kynjafræðings sem hún vann fyrir SGS og RIKK. Hún sagði þjóna þá sem helst verði fyrir kynferðislegri áreitni á vinnustað, hvort sem um hafi verið að ræða áreiti af hálfu yfirmanns, samstarfsfélaga eða kúnna.

„Það eru sterkar vísbendingar um að áreitni sé meiri í þjónustugreinum en annars staðar. Það eru ákveðnir þættir í umhverfinu sem býr til áreiti. Það er mikil vinna á óreglulegum tímum þannig að mörkin á milli vinnunnar og félagslífsins verða kannski svolítið óljós, lítið starfsöryggi og fjárhagsleg valdastaða, það er ef þú ert háður yfirmanni þínum um hvort þú færð vinnu eða ekki,“ sagði hún. Þá séu jafnvel dæmi um að starfsfólk sé hvatt til að daðra við viðskiptavini til þess að fá þá til þess að kaupa meira.

Um 45 prósent kvenna sem tóku þátt í rannsókninni sögðu kynferðislega áreitni hafa mjög mikil eða frekar mikil áhrif á öryggistilfinningu sína. Hins vegar sagði enginn karlmaður að kynferðisleg áreitni hefði áhrif á öryggistilfinninguna.  Drífa sagðist tengja þessar niðurstöður við valdbundið áreiti, því konur verði frekar fyrir áreiti af hálfu yfirmanns eða samstarfsmanns, en karlar frekar af hálfu viðskiptavina.

„Það er rosalegur munur á því hvort þú verðir fyrir áreiti af hálfu yfirmanns, samstarfsfélaga eða kúnna. Kúnnarnir fara eftir kvöldið og sofa úr sér en yfirmenn og samstarfsfélagar eru áfram á vinnustaðnum,“ sagði hún, en í sextíu prósent tilvika var áreitnin af hálfu viðskiptavina.

Drífa sagði jafnframt að samkvæmt rannsóknum ITUC, Alþjóðasamfélags verkalýðsfélaga, hafi um helmingur kvenna á vinnumarkaði í þróuðum löndum orðið fyrir kynferðislegri áreitni. Samkvæmt sömu niðurstöðum sé meira um kynferðislega áreitni í Skandinavíu en í Suður-Evrópu.