Telur valdamikla menn hafa reynt að afskrifa sig í umræðunni

Andri Snær Magnason, forsetaframbjóðandi og rithöfundur, segir sig hafa boðað hófsama stefnu í atvinnumálum gegn öfgafullri stóriðjustefnu stjórnvalda þegar hann gaf út bókina Draumalandið. Hann velur kók framyfir pepsi, hefur ekki löngun til að fara á þing og segir forsetaembættið skapandi. Þetta kom fram í beinni útsendingu Nova þar sem Andri var tekinn fyrir á forsetagrilli fyrirtækisins.

„Ég held að þegar maður potar í valdamikla menn að þá reyna þeir að gefa þér ákveðinn stimpil til að afskrifa þig,“ sagði Andri Snær aðspurður út í þær fullyrðingar um að hann sé ofstækisfullur þegar kemur að umhverfisvernd.

„Ég er mikill hófsemdarmaður,“ sagði hann og bætti við að honum þætti stundum nóg um, hann teldi sjálfan sig stundum mega taka miklu dýpra í árinni.

„Á Íslandi átti að sprengja, spilla og skerða mörg fallegustu svæði á Íslandi til að virkja. Það stóð bókstaflega til að eyðileggja hálendi Íslands. Það var mjög öfgafull stefna. Ég skrifaði bók um hugmyndir og hugsjónir um að þróa atvinnulíf í allt aðra átt en stóriðjustefnu.

Ég myndi segja að stefnan sem ég skrifaði gegn hafi verið öfgafull en að mín viðhorf hafi verið ósköp venjuleg nýsköpunarviðhorf,“ útskýrir Andri en hann er hvað þekktastur fyrir bókina sína Draumalandið sem kom út árið 2006. Hann vísaði í þessi skrif þegar hann var spurður út í það hvort það væri nægilega mikill töggur í honum til þess að geta orðið góður forseti. 

Stóð í hárinu á „ráðandi elítu landsins“

„Ég var þrjátíu og tveggja ára þegar ég skrifaði Draumalandið og þá fór ég gegn ráðandi elítu landsins sem stefndi á mjög stórkarlalegar framkvæmdir.“ Hann segist hafa staðið keikur með sitt rit og sínar meiningar og hugsjónir - staðið með sjálfum sér þrátt fyrir að það hafi ekki verið auðvelt. „Ég myndi segja að sá maður sem steig upp þá sé sá maður sem stígur upp núna.“

Andri hefur boðað það að eitt af þeim málum sem hann vill sem forseti setja á dagskrá sé þjóðgarður á hálendinu. 

Ein spurninganna sem hann fékk frá fylgjendum Nova á Facebook var sú hvort að hann hefði áhuga á að fara á þing ef hann nær ekki kjöri sem forseti. 

„Ég hef enga sérstaka löngun til að fara á þing,“ sagði hann. Hann langar heldur að geta rætt hugmyndir á breiðum grundvelli og telur að Ísland þurfi vettvang þar sem sem Ísland er rætt í stóra samhenginu. Hann segist hafa verið landlaus í pólitík en að hann aðhyllist blandað hagkerfi Norðurlandanna, blöndu af hinu opinbera kerfi og hinu einkarekna.