Skólarnir á Norðurlandi verða ekki sameinaðir

Fimm framhaldsskólar á Norðurlandi, frá Ólafsfirði til Húsavíkur, munu eiga með sér náið samstarf strax á næsta skólaári. Ekki mun koma til sameiningar skólastofnana. Er það niðurstaða skýrslu starfshóps um stöðu og framtíð framhaldsskólastarfs á norðaustursvæði sem skilað var til ráðuneytis menntamála í síðustu viku.

Mennta- og menningarmálaráðherra kynnti í sumar þá ákvörðun að kortleggja starfsemi menntaskóla á norðaustursvæði með skipan starfshóps með heimamönnum. Í Eyjafirði eru þrír menntaskólar, einn í Ólafsfirði og tveir á Akureyri en einnig eru tveir í Þingeyjarsýslum; á Laugum í Reykjadal og á Húsavík.

„Mér líst vel á þessar hugmyndir og það verður spennandi að fást við þetta verkefni,“ segir Lára Stefánsdóttir, skólameistari MTR á Tröllaskaga, sem er ánægð með að samvinna verði ofan á í stað sameiningar skóla. „Samvinnuleiðin er farsælli, þá fer orka í að efla nám fyrir nemendur, auka valmöguleika og styrkja faglega innviði í stað þess að orkan fari í stjórnsýslubreytingar.“

Tilgangurinn er að styrkja menntaskólana í því að bjóða nemendum greiðan aðgang að lögbundnu og fjölbreyttu námsframboði. „Nemendaþróun á norðaustur­svæði hefur verið á þann veg að nemendum skólanna hefur fækkað á undanförnum árum vegna minni árganga upp úr grunnskóla og útlit er fyrir að svo geti orðið áfram,“ segir í skýrslunni sem send var ráðherra.

Illugi Gunnarsson, mennta- og menningarmálaráðherra, hefur rætt við heimamenn og hann segir gott hljóð í skólameisturum á svæðinu. „Ég átti fund í upphafi vikunnar með skólastjórnendum framhaldsskólanna og sveitarstjórnarmönnum vegna málsins. Það er samhljómur í þeim hópi um að stíga skref í átt að frekara samstarfi, með það að markmiði að nemendur á svæðinu geti áfram notið góðs náms í sinni heimabyggð,“ segir Illugi. „Ég er ánægður með að málinu skuli miða með þessum hætti, á grundvelli tillagna frá þeim sem best þekkja til þess. Það er mjög jákvætt að það sé vilji til að samnýta krafta allra til að ná þeim markmiðum sem lagt var upp með, nemendum til hagsbóta.“