Vignir sá rautt í dramatísku jafntefli

Lið Vignis Svavarssonar, Midtjylland, kastaði frá sér sigrinum í leik gegn Álaborg í kvöld.

Er innan við þrjár mínútur voru eftir af leiknum var Midtjylland yfir 26-23. Álaborg skoraði þrjú síðustu mörkin og þar af jöfnunarmarkið átta sekúndum fyrir leikslok. Lokatöur 26-26.

Vignir fékk beint rautt spjald er tvær mínútur voru eftir af leiknum og Álaborg náði að nýta sér liðsmuninn.

Línumaðurinn sterki skoraði þrjú mörk fyrir Midtjylland í leiknum úr fjórum skotum.

Midtjylland forðaðist fallsvæðið með stiginu en er eftir sem áður í ellefta sæti dönsku úrvalsdeildarinnar.