Varðveita dansk-íslenska framburðinn

Við erum að koma upp gagnagrunni sem við köllum danis.is. í samvinnu við Landbókasafnið og sagnfræðinga og erum þegar komin með nokkur einka skjalasöfn. Það eru svo margir Danir sem hafa búið hér, verið gestir, ferðast um landið og eiga merkilegar myndir og aðrar heimildir í fórum sínum,“ segir Auður Hauksdóttir, forstöðumaður Stofnunar Vigdísar Finnbogadóttur í erlendum tungumálum.

Hún segir vefinn einkum snúast um Dani á Íslandi. „Hér voru margir danskir kaupmenn og embættismenn í upphafi síðustu aldar en upp úr stríði kom hingað fjöldi af ungu fólki, iðnaðarmönnum, hjúkrunarkonum og fleiri stéttum í leit að tækifærum og betra lífi. Enn eru fyrstu handar heimildir til hjá þessu fólki, bréf, myndir, frásagnir og ýmis gögn sem við sækjumst eftir.“

Hún nefnir áhugaverðan kassa sem vefnum áskotnaðist frá hjónum í Kaaberfjölskyldunni með gögnum frá fyrsta bankastjóra Landsbankans og prívat bréfum hans, ýmsu um félag Dana á Íslandi og myndum sem voru teknar við lýðveldisstofnunina bæði á Þingvöllum og í Reykjavík.

„Svo erum við viðtöl á hljóðskrám við eldri Dani sem bjuggu hér og töluðu blöndu af dönsku og íslensku. Það er gaman að eiga þann framburð því eftir nokkur ár veit enginn hvernig hann var.“

Auður segir líka með stolti frá ráðstefnu sem námsleið í dönsku hjá HÍ heldur í dag í fyrirlestrasal Þjóðminjasafnsins og nefnist Á mótum danskrar og íslenskrar menningar.  Aðgangur að henni er opinn öllum, ókeypis.

Greinin birtist fyrst í Fréttablaðinu 9. apríl.