Greiddu fyrir mat með fölsuðum seðlum

Lögreglan á höfuðborgarsvæðinu rannsakar nú mál þar sem falsaðir 10.000 króna seðlar voru notaðir til að greiða fyrir veitingar á matsölustað í miðborginni í síðustu viku.

Í tilkynningu frá lögreglunni segir að fyrr í mánuðinum hafi komið upp annað slíkt mál en þar var maður handtekinn eftir að hafa ætlað að greiða fyrir viðskipti á bensínstöð í austurborginni með fölsuðum 10.000 króna seðli. Þar leiddi árverkni starfsmanns til handtökunnar.

„Lögreglan beinir þeim tilmælum til afgreiðslufólks að vera á varðbergi vegna þessa og hvetur jafnframt til þess að þeir sem eru í afgreiðslustörfum kynni sér helstu öryggisþætti íslenskra peningaseðla á heimasíðu Seðlabanka Íslands, en með þær upplýsingar að leiðarljósi á að vera auðvelt að greina á milli falsaðra og ófalsaðra peningaseðla. Ef fólk verður vart við falsaðan seðil skal kalla til lögreglu í gegnum 112,“ segir í tilkynningunni.