Eingöngu ein fasteignasala uppfyllti öll skilyrði

Aðeins ein af 109 fasteignasölum sem Neytendastofa kannaði í byrjun árs uppfyllti öll skilyrði sem gerð eru til upplýsinga um þjónustuna, það er fasteignasalan Nýtt heimili.

Athugað var meðal annars hvort verð á öllum þjónustuþáttum væri sýnilegt á staðnum og á vefsíðum fyrirtækjanna þar sem skylt er að gefa upp verð bæði þar sem þjónustan er kynnt og seld auk þess sem sérstaklega þarf að taka fram ef annar kostnaður bætist við verðið.

Flestar athugasemdir sem voru gerðar voru vegna skorts á upplýsingum um söluaðilann. Jafnframt vantaði sýnilega söluþóknun á flestar vefsíður. Greint er frá þessu á vef Neytendastofu.