Þreyta meginorsök flugslyss á Keflavíkurflugvelli

Meginorsök flugslyss sem varð á Keflavíkurflugvelli í júlí 2013 er rakin til þreytu flugmanna. Hún varð til þess að flugmenn vélarinnar gáfu röngum hreyfli inn í fráhvarfsflugi, eftir að flugvélin snerti flugbrautina. Snerting vélarinnar við brautina sló út sjálfvirknibúnaði fyrir fráhvarfsflugið.

Þetta kemur fram í skýrslu rannsóknarnefndar samgönguslysa sem gefin var út í dag. Slysið varð þegar rússnesk þota af gerðinni Sukhoi Civil hafnaði utan flugbrautar hinn 21. júlí 2013. Einn slasaðist á fæti þegar vélin brotlenti en alls voru fimm manns um borð.

Rannsóknarnefndin leggur til níu tillögur er varða öryggi í skýrslunni. Þremur þeirra er beint til framleiðanda vélarinnar, þremur til Isavia, einni til Samgöngustofu, einni til iðnaðar- og viðskiptaráðuneytis Rússlands og einni sameiginlega til Flugöryggisstofnunar Evrópu og flugslysanefndar Rússlands. Þá er einum tilmælum beint til innanríkisráðuneytisins, en skýrsluna í heild má lesa hér.

Fjallað var um málið á Stöð 2, líkt og sjá má í myndskeiðinu hér fyrir neðan.