Óvænt bakslag á nýju munaðarleysingjahæli

„Í gær upplifði ég einn versta dag lífs míns,“ skrifaði forstöðumaðurinn Anna Þóra Baldursdóttir á Facebook-síðu barnaheimilisins Villekulla á skírdag.

Stöð 2 greindi frá því fyrir ári að Anna Þóra Baldursdóttir og sænsk vinkona hennar hygðust opna heimili fyrir munaðarlaus börn í Naíróbí í Kenía. Anna Þóra hafði þá verið sjálfboðaliði á slíku heimili eftir að hún fór fyrst út árið 2013. Í Fréttablaðinu 10. febrúar síðastliðinn sagði Aníta G. Axelsdóttir, sem þá var á leið út til að starfa á nýja heimilinu, að starfsleyfi væri loks í höfn. Nýfædd stúlka væri komin á heimilið.

Snurða er nú hlaupin á þráðinn. „Ég frétti að barnaverndarfulltrúi lögreglunnar væri ósáttur við að litla daman væri hjá okkur,“ skrifar Anna á síðu Villekulla. Hún kveður barnaverndarfulltrúann hafa talið pappírsvinnuna ófullnægjandi og að heimilið hefði ekki rétt á að hafa barnið. „Ég varð því að fara og sækja hana og koma með hana innan klukkutíma.“ Anna Þóra segir skrítið að sá sem bað hana um aðstoð með því að taka við stúlkunni, sem heitir Arusha, sé með nákvæmlega sömu pappíra og hún til þess að hefja rekstur heimilisins.





„Heimilið sem hún færði barnið á er líka með nákvæmlega sömu pappíra og ég en samt var í lagi að setja hana þangað. Þessi heimili og svo mörg fleiri eru því með allt sama og ég,“ lýsir Anna Þóra sem kveður því nú borið við að verið sé að breyta reglum og að hún þurfi að ljúka öðru ferli áður en hún taki við börnum. „Ég gæti bilast hvað ég er reið yfir spillingunni í þessu landi. Ég er svo reið og sár að ég á ekki til orð yfir þessu öllu saman. Sem betur fer veit ég að elsku litla stelpan mín er í góðum höndum,“ skrifar Anna Þóra Baldursdóttir á styrktarsíðu barnaheimilisins Villekulla.