Fá bætur vegna handtöku í kjölfar gruns um kynferðisbrot

Íslenska ríkið hefur verið dæmt til að greiða þremur rússneskum karlmönnum, sem handteknir voru vegna gruns um kynferðisbrot gegn konu, samtals 850 þúsund í miskabætur. Mennirnir þrír höfðu farið fram á samtals fjórar milljónir króna í bætur.

Í dómnum segir að atvik málsins séu að mestu óumdeild. Þau séu í aðalatriðum þannig að mennirnir voru handteknir í íbúð í Hafnarfirði vegna gruns um að einn mannanna hefði framið kynferðisbrot gegn konu sem var gestkomandi í íbúð hans. Hinir áttu að hafa orðið vitni að brotinu og voru því einnig handteknir. Meintur gerandi var í haldi í rúmar átta klukkustundir og hinir tveir í rúmar fimm klukkustundir. Hinn 26. ágúst sama ár var þeim svo tilkynnt að rannsókn málsins hefði verið hætt þar sem ekki hafi verið talinn grundvöllur fyrir áframhaldandi rannsókn.

Þar sem málið var látið niður falla taldi dómurinn að mennirnir ættu rétt á miskabótum, ásamt því sem málskostnaður var látinn niður falla. Sá sem grunaður var um verknaðinn fær 350 þúsund krónur í miskabætur og hinir tveir 250 þúsund hvor um sig.