Settist ölvaður undir stýri en var sýknaður af ákæru um ölvunarakstur

Héraðsdómur Reykjaness hefur sýknað karlmann sem ákærður var fyrir að hafa í desember síðastliðnum ekið bifreið sinni undir áhrifum áfengis á bílastæði Smáralindar. Það þótti hvorki sannað að maðurinn hefði ræst bifreiðina né ekið henni í umrætt sinn. 

Í skýrslu lögreglu segir að þeim hafi borist tilkynningu um að maðurinn sæti hugsanlega ölvaður undir stýri í bifreið sinni við Smáralind. Lögregla hafði upp á bifreiðinni en hún stóð óhögguð á efra bílaplani Smáralindar. Í henni sat maðurinn ásamt tveimur ungum sonum sínum.

Maðurinn hafi verið áberandi ölvaður og læst hurð bifreiðarinnar og ekki orðið við skipunum lögreglu um að drepa á bifreiðinni og opna. Öðrum lögreglumanninum hafi hins vegar tekist að opna bílstjórahurðina og hafi hann skipað manninum að stíga út en hann neitað. Fór svo að maðurinn var dreginn út úr bifreiðinni og hann handtekinn.

Nokkuð eftir sig eftir „þeytivinduna“ í Skemmtigarðinum

Við yfirheyrslur neitaði maðurinn því að hafa ekið bifreiðinni í umrætt sinn, þá kvaddi hann eldri son sinn hafa startað bílnum.  

Maðurinn hafði fyrr um kvöldið farið ásamt sonum sínum í Smáralind en þar hafi þeir fengið sér að borða. Þar hafi hann fengið sér tvo til þrjá bjóra með matnum og verið gæti að þeir hafi verið fjórir. Hann hafi ekki fundið fyrir miklum áfengisáhrifum.

Eftir þetta hafi þeir feðgar ákveðið að fara í bíó og keypt bíómiða á sýningu í Smáralind um áttaleytið en áður hafi þeir farið í Skemmtigarðinn í Smáralind, meðal annars í „þeytivinduna“ og kvaðst ákærði hafa orðið nokkuð eftir sig eftir það.

Fóru út í bíl til að hlusta á tónlist 

Eldri drengurinn hans hefði síðan viljað fara út í bíl að hlusta á tónlist, enda séu góðar græjur í bílnum, og strákurinn fengið afhenta lyklana af bílnum. Hann hafi farið á undan og taldi maðurinn að að eldri drengurinn hafi sett bíllykilinn í skránna og þar með startað bílnum. Ekki hafi hann gert það sjálfur. 

Vitni sagðist hafa séð manninn aka bifreiðinni en það var á öndverðum meiði við það sem lögregla sagði í skýrslu eftir að hafa rannsakað málið. Dómurinn taldi það ekki hafið yfir allan skynsamlegan vafa að maðurinn hafi ekið bifreiðinni í umrætt sinn. Var hann því sýknaður af ákæru málsins.  

Hér má lesa dóm Héraðsdóms Reykjaness í heild sinni.