25 milljónir fara í neyðarsjóð SÞ

Lilja Alfreðsdóttir utanríkisráðherra hefur ákveðið að veita 25 milljónir króna til neyðarsjóðs Sameinuðu þjóðanna. Upphæðin bætist við þær tíu milljónir króna sem settar voru í sjóðinn fyrr á árinu.

Ástæðurnar fyrir fjárveitingunni nú eru meðal annars hamfarirnar á Haíti, vegna fellibylsins Matthíasar sem fór yfir eyríkið í upphafi mánaðarins, og viðvarandi borgarastyrjöld í Sýrlandi.

Samkvæmt mati stofnana Sameinuðu þjóðanna er þörf á 119 milljónum dala í mannúðaraðstoð á Haíti.

Þá hefur sjóðurinn einnig látið fé af hendi rakna til Tsjads, Mið-Afríkulýðveldisins og Jemens. Þeim sem þarfnast neyðaraðstoðar hefur fjölgað mjög á síðustu árum en í septembermánuði einum veitti sjóðurinn 69 milljónir dala í aðstoð í tíu löndum.

Fréttin birtist fyrst í Fréttablaðinu