Hverfisgata endurnýjuð frá Klapparstíg

Borgarráð hefur heimilað umhverfis- og skipulagssviði að bjóða út framkvæmdir við endurnýjun Hverfisgötu á milli Klapparstígs og Smiðjustígs. Kostnaðaráætlun vegna hluta Reykjavíkur er 109 milljónir.

Framkvæmdirnar eru samstarfsverkefni Reykjavíkurborgar, Veitna ohf, Mílu og Gagnaveitu Reykjavíkur. Verður skipt um allar lagnir og brunna í götunni auk þess sem gatan verður endurnýjuð og fegruð í sama stíl og þeir hlutar götunnar sem þegar hafa verið teknir í gegn.

Allt yfirborð göturýmisins verður endurnýjað, hjólastígar verða báðum megin götunnar, ný borgartré verða gróðursett og gatnamótin tekin í gegn.

Reiknað er með að framkvæmdin kosti alls 191 mkr. Haft verður samráð við hagsmunaaðila við götuna, til að mynda uppbyggingaraðila við Hljómalindarreit vegna þeirra takmarkana sem gera þarf á umferð á framkvæmdatímanum.

Síðasti hluti Hverfisgötu, frá Smiðjustíg að Lækjargötu, verður tekinn í gegn á næstu árum.