Fólk of gjarnt á að dæma þingmenn út frá tölfræði

Bjarkey Olsen Gunnarsdóttir, Vinstri grænum, er sá þingmaður sem talaði mest úr ræðustól Alþingis á nýafstöðnu þingi. Alls talaði Bjarkey í 34 klukkustundir og 15 mínútur.

Ræðukóngur síðustu tveggja þinga og flokksbróðir Bjarkeyjar, Steingrímur J. Sigfússon, féll niður í þriðja sætið en Helgi Hrafn Gunnarsson, Pírötum, var sá þingmaður sem talaði næstlengst. Síðustu fimm þing þar á undan féll ræðukóngstitillinn Pétri heitnum Blöndal í skaut.

„Mér þykir þetta mjög ánægjulegt,“ segir ræðudrottningin Bjarkey. Hún á sæti bæði í fjárlaganefnd og allsherjar- og menntamálanefnd og hún segir að það hafi spilað nokkuð inn í. „Það hafa mörg mál verið hjá nefndunum, sem hefur krafist þess að maður taki til máls.“ Vísar hún þar meðal annars í sjálf fjárlögin, frumvarpið um Lánasjóð íslenskra námsmanna, nýtt millidómstig og málefni sem tengjast löggæslu.

Sem stendur er Bjarkey í kosningabaráttu í kjördæmi sínu en hún skipar annað sæti flokksins í Norðausturkjördæmi. Hún segir að ekki andi köldu milli sín og Steingríms, sem skipar fyrsta sætið, þrátt fyrir að hún hafi nappað ræðukóngstitlinum. „Hann hefur allavega ekki rætt það enn,“ segir hún og hlær.

Helgi Hrafn Gunnarsson talaði næstlengst að þessu sinni en hann var einnig sá þingmaður sem tók oftast til máls. „Ég held að menn verði að fara varlega í að draga of miklar ályktanir út frá svona tölum. Það eru til dæmis þingmenn sem vinna á fullu inni í nefndum en taka síðan sjaldan til máls úr ræðustólnum sjálfum,“ segir Helgi. „Ræðutölurnar telja til dæmis ekki viðtöl, hádegisfundi og fleira sem fylgir starfinu. Hvenær maður er í vinnunni er ekki einföld spurning.“

Píratinn segir að fólk sé of gjarnt á að dæma þingmenn út frá einhverjum tölum og tölfræði. „Margir þingmenn eru harðduglegir þó þeir tali ekki mikið. Það sem mér finnst ánægjulegast við að hafa talað svona oft og svona lengi er að ég get loksins sagt þetta án þess að hljóma í vörn,“ segir Helgi. 

Fréttin birtist fyrst í Fréttablaðinu