Velþóknun lækna sögð forsenda einkaspítala

Gunnar Ármannsson, stjórnarmaður í MCPB ehf. sem hyggst reisa einkarekið sjúkrahús í Mosfellsbæ, segir að að spænski læknirinn Pedro Brugada, sem sjúkrahúsið á að vera nefnt eftir, hafi talið það forsendu fyrir aðkomu sinni að verkefninu að ekki væri andstaða meðal hérlendra lækna við það.

Þrír yfirlæknar á hjartadeild Landspítalans lýstu yfir áhyggjum af áformunum í grein í Morgunblaðinu um síðustu helgi. „Að sjálfsögðu tökum við alvarlega þær gagnrýnisraddir sem koma frá Landspítalanum,“ segir Gunnar. Brugada hafi fundað með íslenskum læknum hér á landi í vor til að kanna hvernig þeim hugnaðist að hann hæfi starfsemi á Íslandi. „Hann ætlaði ekki að taka nein frekari skref í þá áttina ef honum fyndist sér ekki vera vel tekið. Hann taldi, eftir þessa fundi, að hann hefði átt góð samtöl við lækna og æðstu embættismenn og það væru forsendur fyrir hendi til þess að koma hingað til starfa,“ segir Gunnar. Brug­ada hefur sagt að hann stefni á að hefja starfsemi í Klíníkinni í Ármúla í október.

„Nú er það í hans höndum að vega það og meta hvað hann vill gera,“ segir Gunnar um Brugada. Hann hafi litið svo á að það væri fengur fyrir íslenska heilbrigðiskerfið að fá lækni með jafn mikla sérfræðiþekkingu og Brugada til landsins.

„Ég get ekki betur séð en að sumir hafi farið á taugum í síðustu viku þegar fréttir fóru að berast og tjáð sig um það án þess að afla sér upplýsinga frá forsvarsmönnum verkefnisins,“ segir Gunnar. Þá segir hann að fyrir liggi skilaboð í heilbrigðisráðuneytinu um að forsvarsmenn MCPB séu tilbúnir að hitta Kristján Þór Júlíusson heilbrigðisráðherra til að upplýsa hann um verkefnið hvenær sem honum henti.

Gunnar efast um að það verði haldinn blaðamannafundur þegar Alþingi kemur saman líkt og Henri Middeldorp, stjórnarformaður MCPB, hélt fram í Fréttablaðinu í síðustu viku, þar sem átti að útskýra verkefnið frekar. „Okkar hugmynd var að vildum helst ekki vera að tjá okkur mikið í fjölmiðlum heldur ræða við hlutaðeigandi sem þurfa að koma að málinu beint og milliliðalaust.“

Gunnar segir að sýna þurfi fram á hverjir fjárfestar í verkefninu séu þegar sótt verði um ívilnanir til atvinnuvegaráðuneytisins. Aldrei hafi staðið til að halda því leyndu. „Við settum það sem skilyrði að það yrði sótt um þessar ívilnanir til þess að það lægi algjörlega fyrir hvaðan þessir fjármunir myndu koma.“ Gunnar segir að stefnt verði að því að leggja samsvarandi gögn fyrir Mosfellsbæ fyrir 1. desember 2017, en MCPB hefur til þess tíma til að sýna bæjaryfirvöldum fram á hvernig verkefnið verði fjármagnað og af hverjum.