Ein öldruð prjónaði pollróleg meðan húsið var rýmt

Mikill viðbúnaður var vegna reyks sem kom upp á dvalar- og hjúkrunarheimilinu Klausturhólum á Kirkjubæjarklaustri um klukkan sex á fimmtudagsmorgun. Þurftu hinir öldruðu íbúar að yfirgefa húsakynnin í snatri. Ekki reyndist þó um eld að ræða heldur hafði skrautkerti bráðnað ofan í rafmagnsofn og upp gaus reykur og ólykt sem ræsti brunakerfið.

Anna Gyða Gunnlaugsdóttir, hjúkrunarforstjóri á Klausturhólum, er eftir á að hyggja mjög ánægð með hvernig gekk að rýma híbýlin. „Þetta var góð brunaæfing.

Slökkvilið og aðrar bjargir voru ræstar út þá þegar og var hafist handa við að rýma þá álmu heimilisins sem reykurinn var í. Í skeyti lögreglu segir að enginn eldur hafi verið sjáanlegur. En, „við nánari skoðun kom í ljós að rafmagnsofn undir glugga var stilltur á yfir 30°C og í gluggakistu var kerti sem hafði bráðnað við hitann og vaxið lekið niður á ofninn og af því varð talsverður reykur. Öll viðbrögð og aðgerðir á staðnum gengu fumlaust fyrir sig.  Engum varð meint af og ekkert tjón að heitið gæti.“

Anna Gyða segir að í fyrstu hafi engar skýringar fundist á þessu en seinna kom í ljós að það hafði lekið svo sem einn fjórði úr teskeið í rafmagnsofninn með þeim afleiðingum að mikil lykt og svo reykur myndaðist.

„Á tímabili héldum við að kviknað væri í loftræstikerfinu. Eða, við vildum útiloka að svo gæti verið. Svo kom í ljós að þetta var mjög saklaust og allir kallaðir heim.“

Heimilisfólki var eðlilega brugðið en lét þetta þó ekki raska ró sinni um of. „Einni féll ekki verk úr hendi og prjónaði allan tímann!“

Anna Gyða er mjög ánægð með öll viðbrögð. „Það kom hellingur af fólki aðvífandi. Heimamenn voru fljótir að koma. Einn sjúkraliði var á vakt sem brást hárrétt við og stóð sig mjög vel, kom öllu fólki í skjól þá þegar. Nýbúið var að fara yfir allt brunavarnarkerfið. Það virkaði hundrað prósent. Allir brugðust hratt og mjög vel við. Þetta reyndist góð brunaæfing,“ segir Anna Gyða hjúkrunarforstjóri.