Tegundasvik í sölu á fiski virðast útbreitt vandamál

Rannsóknir alþjóðlegu náttúruverndarsamtakanna Oceana á tegundasvikum í sölu sjávarfangs sýna áþekkar niðurstöður og rannsóknir Matís hér á landi. Rannsóknir samtakanna í 21 fylki í Bandaríkjunum sýndu að af 1.200 sýnum sem safnað var voru í 33 prósentum tilfella aðrar fisktegundir í pakkningum en merkingar sögðu til um. Oceana rannsakaði einnig hvernig málin stæðu á veitingastöðum í Brussel og í mötuneytum stofnana Evrópusambandsins. Í Brussel var um að ræða aðra tegund en fram kom á matseðli í 31,8 prósenta tilfella, segir í frétt Matís.

Í alþjóðlegri rannsókn sem Matís er þátttakandi í, og er enn ólokið, kom meðal annars fram að um 30 prósent allra sýna, sem tekin hafa verið á veitingastöðum hérlendis, innihéldu annan fisk en tilgreint var á matseðli, eins og fram hefur komið í fréttum Matís. Rannsóknin nær til tegundagreiningar á fiski, hvort fisktegund, samanber niðurstöður erfðarannsókna, sé í samræmi við það sem gefið er upp, og taka yfir fjörutíu aðilar um alla Evrópu þátt.

Í frétt Matís segir að ljóst sé að heilindi með sjávarfang sé mikið efnahagslegt hagsmunamál fyrir framleiðendur, seljendur, neytendur og ekki síst þau lönd sem keppa um markaðshlutdeild á alþjóðlegum mörkuðum.

Matís tekur lýsandi dæmi: Þegar ódýr hvítfiskur er seldur sem þorskur úr Norður-Atlantshafi getur verðmunurinn verið mjög mikill og leitt af sér lægra verð fyrir þorskinn og þorskafurðir. Marine Stewardship Council (MSC) hefur bent á að hefðbundið verð fyrir brauðaðan pangasíus, sem er eldisfiskur upprunninn í Víetnam, sé um fjórar evrur [575 krónur] á hvert kíló en verðið á þorski geti verið um 25 evrur [3.600] á hvert kíló. 

Þessi grein birtist fyrst í Fréttablaðinu þann 31. mars.