Svifryk líklega yfir heilsuverndarmörk

Styrkur svifryks verður líklega yfir sólarhrings-heilsuverndarmörkum í Reykjavík í dag. Verst eru loftgæðin við mælistöðina við Grensásveg. Þar mælist styrkur svifryks 183,98 míkrógrömm (µg) í hverjum rúmmetra. Klukkan 12:30 mældist styrkurinn 214 µg/m³.

Heilsumörkin eru 50 µg/m³.

Styrkurinn í Fjölskyldu- og húsdýragarðinum mældist 43 míkrógrömm klukkan hálf eitt. Þá var hann einnig 34 míkrógrömm í Bólstaðarhlíð og 82 míkrógrömm við Holtaveg.

Hægt er að fylgjast með styrk svifryks og annarra mengandi efna á vefsvæði Reykjavíkurborgar. Þar má sjá kort yfir mælistaði.

Borgin er með fastar loftgæðamælistöðvar á Grensásvegi og í Fjölskyldu- og húsdýragarðinum. Loftgæðafarstöðvar Heilbrigðiseftirlits Reykjavíkur eru nú staðsettar við leikskólann Stakkaborg í Bólstaðarhlíð 38 og við frístundaheimilið Glaðheima, Holtavegi 11.