Raunverulegir hagsmunir nemenda?

Ljóst er að í skipulagsumræðu um hvar reisa skuli nýjan Landspítala þarf að taka til greina mörg mikilvæg sjónarmið. Meðal hagsmunaaðila eru nemendur Heilbrigðisvísindasviðs Háskóla Íslands en á heilbrigðisvísindasviði fer meðal annars fram fagmenntun framtíðarstarfsfólks nýs spítala.

Nýverið lét forsætisráðherra Sigmundur Davíð Gunnlaugsson þau ummæli falla að Hringbraut sé ekki ákjósanlegasta staðsetningin fyrir byggingu nýs spítala og benti á Vífilstaðartún sem nýjan möguleika í því samhengi. Fyrir það fyrsta hafa skýrslur og mat margra fagaðila ítrekað leitt í ljós að Hringbraut er hagkvæmasti og öruggasti kosturinn, nú síðast í skýrslu KPMG. Ef reisa á spítala annars staðar en við Hringbraut er nokkuð ljóst að hugmyndir um kennslusjúkrahús muni ekki standast. Náin tenging spítala við háskólasamfélag leiðir af sér ríkari fagþekkingu nemenda sem þangað sækja sitt nám. Fagþekking þessi hefur mikil verðmæti.

Fyrirkomulag við flutning á Vífilstaðartún mun óhjákvæmilega eftir að koma niður á gæðum kennslu við Heilbrigðisvísindasvið. Starfsemi sviðsins er þegar mjög dreifð um borgina og myndi nýr spítali fjarri háskólasvæðinu fyrir hluta nemenda sviðsins splundra henni enn frekar og auka á byggingaflakk sem nemendur Heilbrigðisvísindasviðs þurfa nú þegar að leggja á sig. Sú dreifing sem þegar er til staðar er er talin kosta landsmenn háar upphæðir vegna hærri rekstrarkostnaðar og myndi tilfærsla hluta sviðsins á nýjan stað auka enn frekar á þessa óhagkvæmi. Tækifæri til náms á formi þverfaglegrar kennslu, sameiginlegra rannsókna, nýsköpunar og fleira glatast enn frekar við slíka splundrun. Spyrja má hvaða deildir Heilbrigðisvísindasviðs eigi að flytja fjær háskólasvæðinu, hvaða rök liggi þar að baki og hvort þeir nemendur sem eiga í hlut hafi verið eða verði nokkurn tímann spurðir álits á því.

Sigmundur Davíð leyfir sér að fullyrða á Alþingi á mánudaginn síðastliðinn að „óþarfi sé að nemendur á heilbrigðissviði séu í nálægð við allar aðrar háskólabyggingar á hverjum degi“. Ummæli þessi eru óábyrg og illa ígrunduð. Stoðþjónusta Háskóla Íslands er mikilvæg háskólanemum og má þar nefna leikskóla FS, náms- og starfsráðgjöf, bóksölu og fjölmargt annað. Það skal vera öllum ljóst að stoðþjónusta sem þessi mun ekki flytja með á Vífilstaðatún eða í Garðabæ og ylli það hluta stúdenta á Heilbrigðisvísindasviði miklu raski ef flytja ætti sviðið þangað.

Þegar manneskja á borð við forsætisráðherra setur fram fullyrðingar þvert á allar samþykktir verður maður að velta fyrir sér hvort slíkar fullyrðingar séu eingöngu til þess ætlaðar að skapa óeiningu og eitra umræðuna eða jafnvel hvort einhverjir sérhagsmunir liggi að baki. Flutningur hluta Heilbrigðisvísindasviðs á Vífilsstaði, í Efstaleiti eða Garðabæ er í það minnsta ekki til þess fallið að bæta stöðu nemenda við Heilbrigðisvísindasvið.