Miklir vatnavextir á Þingvöllum: Kafarar þurftu frá að hverfa í Silfru

Miklir vatnavextir hafa verið víðast hvar á landinu í dag en landverðir á Þingvöllum þurftu að loka nokkrum stígum og setja keilur og línur við Öxarárfoss til að stýra umferð ferðamanna svo enginn færi sér að voða.

Öxará og Öxarárfoss breyttu um svip í þessu vatnsveðri en það hjálpar til að ekki er frost í jörðu og tekur því við töluverðu af vatni, en staðan hefði væntanlega verið verri ef rignt hefði svo mikið á frosna jörð.

Einar Á. E. Sæmundsen, fræðslufulltrúi Þjóðgarðsins á Þingvöllum, tók meðfylgjandi myndir sem birtar voru á Facebook-síðu Þjóðgarðsins fyrr í dag en þar mátti sjá vaska kafara sem ætluðu sér að skoða Silfru en þurft frá að hverfa því hún varð svo gruggug í þessum vatnavöxtum.

Þeir brugðu hins vegar á leik fyrir framan ljósmyndara á Þingvöllum fyrr í dag sem sjá má í albúminu hér fyrir neðan.

Hægt er að skoða Facebook-síðu Þjóðgarðsins hér.