Forsætisráðuneytið hættir afskiptum útliti húsa á Hafnartorgi

Ríkið mun einbeita sér að byggingu húsnæðis fyrir ráðuneyti á lóð sem það á við Skúlagötu og láta af afskiptum að útliti húsa á Hafnartorgi. Verktaki húsanna á Hafnartorgi segir að hugmyndir fyrrverandi forsætisráðherra um byggingar á torginu hafi ekki verið raunhæfar.

Fyrrverandi forsætisráðherra hafði miklar skoðanir á því hvernig húsin sem rísa munu upp úr grunninum á Hafnartorgi ættu að líta út. En eftir að hann er farinn úr forsætisráðuneytinu mun ráðuneytið ekki hafa frekari afskipti af málinu.

„Þetta voru áhugamál forsætisráðherra og við vorum alveg tilbúin til að hlusta á hans hugmyndir og þær hafa komið fram. Boltinn hefur legið hjá þeim samt sem áður. Í ljósi þess að hann er farinn í burtu er þessu sjálfhætt sýnist mér,“ segir Gísli Steinar Gíslason stjórnarformaður Landstólpa þróunarfélags sem byggir húsin á lóðinni.

Félagið hafi fengið byggingarleyfið í hendur frá borginni í síðustu viku og byrjað verði að slá upp bornplötu eftir um hálfan mánuð. Byggingarnar sjö muni rísa innan 19 mánaða. Þær hugmyndir sem forsætisráðuneytið hafi lagt fram um útlit húsanna hafi ekki verið raunhæfar.

„Ekki nákvælega eins og þær voru lagðar fram. En það reyndi aldrei á hvort hægt væri að fara einhverja málamiðlun. Við vorum alltaf tilbúnir að skoða alla möguleika og alltaf lýst því yfir. En eins og þeir lögðu þetta fram var þetta kannski svolítið langt gengið miðað við það semv ið höfum í höndunum í dag,“ segir Gísli Steinar.

Regin hefur keypt allar jarðhæðir húsanna og þar á bæ segja menn eftirspurnina eftir verslunar- og þjónustuhúsnæði mjög mikla bæði innanlands- og utanlands frá þótt ekki sé gefið upp hvort Hennes og Mauritz (H&M) séu meðal áhugasamra aðila.

Stefán Thors húsameistari ríkisins segir ríkið nú horfa til stórrar lóðar sem ríkið hefur átt áratugum saman við Skúlagötu og ætluð hefur verið undir stjórnarráðsbyggingar.

„Það verður væntanlega auglýst og þá sjáum við hver niðurstaðan verður. Einn kosturinn er sá að byggja bara nýtt hús á stjórnarráðsreitnum.“

Þá náttúrlega fyrir mörg ráðuneyti?

„Fyrst og fremst forsætisráðuneytið en síðan eru eitt eða tvö önnur sem kæmu þar í framhaldinu,“ segir húsameistari ríkisins. Hafnartorgið sé hins vegar út úr myndinni.

„Það var ákveðinn áhugi hjá forsætisráðherra að fara þarna niðureftir og hafa áhrif á útlitið. Eins og hefur komið fram var ekki grundvöllur til slíkra saminga þannig að það á bara ekki við lengur,“ segir Stefán Thors.