Tíska snýst um sjálfstjáningu

Tara Margrét Vilhjálmsdóttir félagsráðgjafi er oft spurð hvar hún fái fötin sín enda einstök smekkkona sem elskar að kaupa föt og verslar mikið á netinu.

Hvar kaupir þú oftast föt?

Ég versla mest hjá netversluninni Asos og svo í Curvy í Fákafeni. Generous-línan í Lindex hefur líka gefið af sér einstaka gullmola. Curve-línan hjá Asos er gargandi snilld. Þeir eru með allt fyrir alla og má oft sjá sömu flíkina í normal size-deildinni og í Curve-deildinni hjá þeim, en í seinna tilvikinu býðst hún einfaldlega í stærri stærðum. Asos curve blæs á þá mýtu að sum snið henti ekki stærri stelpum og að við þurfum að klæða okkur til að fela „vandamálasvæðin“. Ég var alltaf skíthrædd við að kaupa föt á netinu en hjá Asos fann ég bara mína stærð og get treyst á að flíkin smellpassi svo lengi sem hún er í þeirri stærð. Ég mæli með að fylgja málunum á síðunni, ef þú ert í vafa skaltu frekar fara upp í stærð en niður. Oft hefur maður séð hvernig gæðin minnka með stærri stærðum. Svo er ekki hjá Asos Curve. Hærri verðmiði fylgir þó betri gæðum og þessi verslun er ekki á allra færi, hvað þá með tollum og innflutningsgjöldum.

Klæðir þú þig á ólíkan hátt eftir tilefni? 

Ég er misfín eftir tilefni en samt alltaf trygg mínum stíl sem ég reyni að hafa eins klassískan og ég get. Ég reyni alltaf að lágmarka líkurnar á að ég skoði myndir af mér eftir 10 ár og við blasi tískuslys. Það má því ekki beinlínis segja að ég sé áhættusækin þegar kemur að tísku.

Finnst þér skemmtilegt að kaupa föt? 

Ég elska að kaupa föt, sérstaklega með tilkomu Asos Curve.

Finnst þér gaman að klæða þig upp á/vera í skemmtilegum fötum? 

Mér finnst fátt skemmtilegra en að hafa mig til fyrir djammið eða eitthvað fínt. Það er hálfgert ritúal hjá mér. Enda tekur það hátt í 4 tíma þegar ég fer all in, með förðun og hári!

Hver er uppáhaldsflíkin þín? 

Af hverju er hún uppáhalds? Hvar fékkstu hana? Ég myndi segja að það sé samfestingurinn minn. Hann er svo praktískur því hann gengur við öll tilefni. Um daginn fór ég í honum í móttöku í Höfða og svo brunaði ég í vinnuna eftir á. Smellpassaði við báðar aðstæður. Hann er líka svo ótrúlega þægilegur og mér líður svo vel í honum. Að sjálfsögðu fékk ég hann hjá Asos.

Hvað kaupirðu þó þú eigir nóg af því? 

Blazer-jakka. Að mínu mati eru þeir klassískir og tímalausir og passa við ALLT! Enda á ég 10 stykki. Hver þarf 10 blazera!?! Þegar ég var að kenna líkamsmyndarnámskeiðið Body Project í vetur flaug ég og keyrði um allt land og þetta voru 10-12 tíma dagar á stanslausum þönum. Það var því mikilvægt að vera í þægilegum fötum og ég var því oftast í svörtum jógabuxum, skyrtu og blazer en ég virkaði samt fín. Blazer gerir allt fínna, punktur!

Áttu uppáhaldsskó? 

Ætli það séu ekki Nike Lunarglide hlaupaskórnir mínir.

Einhver skemmtileg saga sem tengist fatakaupum?

Fyrir nokkrum árum voru fatakaup helvíti fyrir mig. Mér leið ekki vel með líkama minn né leið mér vel í honum. Fataskápurinn var fullur af fötum sem voru of lítil en ég tímdi ekki að henda. Það tók mig langan tíma að sjá og skilja að ég er svo miklu meira en bara fatastærðin, sem við eigum til að skilgreina okkur allt of mikið eftir. Í nútíma samfélagi telst það róttækt að líða vel í eigin skinni, standa keik og segja: „Ég er ánægð með sjálfa mig.“ Að mínu mati er það ákveðin tegund sjálfsástar og líkamsvirðingar að kaupa sér flott föt, óháð reglum um hverju feitar stelpur mega klæðast og hverju ekki.

Tíska snýst um sjálfstjáningu og þau skilaboð að feitar konur eigi að fela líkama sína, bæla okkur niður. Tíska snýst um að fagna líkamanum, ekki fela hann. Ég skora á alla að sýna handleggina, magann og lærin óhindrað í sumar. Lífið er of stutt til þess að vera stöðugt í feluleik og því meira sem þú ýtir þér út úr þægindarammanum því auðveldara verður það, ég lofa!