Tveir hinna grunuðu smyglara áfram í haldi

Tveir af fimm mönnum sem grunaðir eru um að smygla fjórum kílóum af amfetamíni og þó nokkru magni af sterum hingað til lands verða áfram í gæsluvarðhaldi næstu vikuna. Frá þessu er greint á vef RÚV en gæsluvarðhald yfir fjórum mannanna rann út í dag. Lögreglan fór ekki fram á varðhald yfir tveimur þeirra og var þeim því sleppt en hinir tveir verða áfram í haldi.

Rannsókn lögreglu á smygli mannanna var umfangsmikil og hafði staðið yfir í nokkrar vikur þegar mennirnir voru handteknir og úrskurðaðir í gæsluvarðhald, en frá þessu var greint í Fréttablaðinu í dag.

Mennirnir eru þrítugs-og fertugsaldri. Þeir eru allir íslenskir ríkisborgarar en einn þeirra er af erlendu bergi brotinn.

Tveir mannanna eru háskólanemar en í starfsnámi hjá líftæknifyrirtæki í Reykjavík en lögreglan rannsakaði meðal annars vinnuaðstöðu mannanna hjá fyrirtækinu. Einn er fasteignasali, einn er sölumaður fæðubótarefna. Þá er fimmti maðurinn starfsmaður hjá póstdreifingarfyrirtæki.