Fékkstu fjólubláa umslagið?

Blóðskimun til bjargar – þjóðarátak gegn mergæxlum hófst fyrir einum mánuði þegar Guðni Th. Jóhannesson, forseti Íslands, skráði sig til þátttöku. Markmið þess er að rannsaka áhrif skimunar fyrir forstigi mergæxlis til þess að bæta líf þeirra sem greinast með mergæxli og leita um leið lækninga við sjúkdómnum. Við höfum nú sent öllum sem búsettir eru á Íslandi og fæddir eru árið 1975 eða fyrr fjólublátt umslag með boði um þátttöku ásamt upplýsingum um rannsóknina.

Á aðventunni er að mörgu að hyggja og líklega berst aldrei jafn mikill póstur heim til landsmanna og þá. Því er hætt við að fjólubláa umslagið hafi farið í bunkann með öðrum pósti. Mikilvægt er að þeir sem vilja leggja Blóðskimun til bjargar lið með þátttöku sinni gæti að því hvort fjólubláa umslagið hafi skilað sér.

Þeim sem ekki hafa fengið umslagið er bent á hafa samband við okkur með því að senda tölvupóst á upplysingar@blodskimun.is eða með því að hringja í 896-0022. Á heimasíðu verkefnisins www.blodskimun.is er einnig hægt að finna þær upplýsingar sem eru í umslaginu.

Til þess að taka þátt í verkefninu þarf að veita upplýst samþykki. Það er hægt að gera með því að senda undirritaða samþykkisyfirlýsingu, sem er í fjólubláa umslaginu, gjaldfrjálst með pósti eða á www.blod­skimun.is með því að nota lykilorðið sem kemur með fjólubláa umslaginu, Íslykli eða rafrænum skilríkjum. Næst þegar þátttakandi fer, einhverra hluta vegna, í blóðprufu, hvar sem er á landinu, mun Blóðskimun til bjargar fá hluta af blóðsýninu til rannsóknar. Því þarf ekki að fara í sérstaka blóðprufu til þess að taka þátt.

Forsenda þess að rannsóknin skili árangri er góð þátttaka og það er óhætt að segja að við höfum fengið góðar viðtökur frá landsmönnum öllum. Þær benda til þess að markmið um þátttöku muni nást og fyrir það erum við afar þakklát. Því fleiri sem skrá sig, því betri möguleika höfum við til að svara lykilspurningum um mergæxli og gagnið af átakinu meira. Með því að bæta þínu nafni í hóp þátttakenda getur þú stuðlað að því að blóðskimun komi til bjargar.

 

Þessi grein birtist fyrst í Fréttablaðinu.