Hótaði að drepa stjúpdætur sínar og rauf nálgunarbann

Hæstiréttur staðfesti í dag með dómi sínum úrskurð Héraðsdóms Reykjavíkur þess efnis að karlmaður skuli sæta gæsluvarðhaldi. Maðurinn liggur undir grun um að hafa beitt eiginkonu sína og stjúpdætur ofbeldi.

Maðurinn hefur áður komið við sögu lögreglu en honum hefur í fjórgang, það sem af er ári, verið gert að sæta nálgunarbanni gagnvart konunum þremur.

Í fyrsta nálgunarbannsdómi Hæstaréttar, sem er frá 15. mars á þessu ári, kemur fram að maðurinn og konan hafi verið gift í tíu ár. Á þeim tíma hafi hann beitt hana andlegu og kynferðislegu ofbeldi. Að sögn konunnar er maðurinn mjög brenglaður kynferðislega og „hann líti á það sem hlutverk hennar að þjónusta hann kynferðislega óháð vilja hennar.“ Meðal gagna málsins er SMS-skilaboð, frá manninum til konunnar, sem í stendur „Geturu komið inn í herbergi til mín og sofið hjá mér og tha færdu sefnfrið allan morgundaginn.“

Maðurinn láti sér það ekki nægja heldur ógni einnig og hóti dætrum hennar. Dæturnar, sem eru 25 ára og 23 ára, hafa borið því við að þær hafi margoft heyrt manninn segja að ef móðir þeirra sofi ekki hjá honum þá „myndi hann bara sofa hjá dætrum hennar.“

Sem fyrr segir hefur manninum í fjórgang verið gert að sæta nálgunarbanni það sem af er ári. Í kjölfar síðasta úrskurðarins, 30. maí síðastliðinn, hóf hann að senda hótanir á konurnar. Til að mynda hafi hann sent skilaboð á aðra dótturina þar sem hann sagði „Nú verdur tú drepin. Bid við vinnu tína [...]“

Maðurinn hefur, frá því í mars á þessu ári, sent 408 skilaboð í síma konunnar sem hann hótaði að drepa. Þá hringdi hann einnig 566 símtöl í heimasíma eiginkonu sinnar á tveggja vikna tímabili í mars.

Maðurinn var handtekinn 1. júní síðastliðinn í 44 metra fjarlægð frá heimili kvennanna en honum var óheimilt að koma nær því en 50 metra. Lögregla hafði verið kölluð á staðinn eftir að maður hringdi dyrabjöllu íbúðar þeirra ítrekað.

Í rökstuðningi Hæstaréttar var fallist á þann rökstuðning héraðsdómara að ætla megi að maðurinn muni halda brotum sínum áfram á meðan máli hans er ólokið. Honum er því gert að sitja í gæsluvarðhaldi til 30. júní næstkomandi. Dóm Hæstaréttar má lesa hér.