Vinstri vængurinn logar í illdeilum

Fjölmargir á vinstri væng stjórnmálanna hafa ekki getað leynt vonbrigðum sínum með það að uppúr síðustu stjórnarmyndunarviðræðum slitnaði. Á samfélagsmiðlum hafa spjótin einkum beinst að óbilgirni Vinstri grænna og fer það mjög fyrir brjóstið á mönnum í þeim herbúðunum.

Uppúr sauð nýverið á Facebookvegg Svavars Gestssonar fyrrum ráðherra Alþýðubandalagsins gamla og föður Svandísar Svavarsdóttur þingmanns og ráðherraefnis Vinstri grænna. Mega þær væringar heita lýsandi fyrir ástandið á vinstri vængnum. Þar er hver höndin upp á móti annarri. Tvíburarnir Sverrir og Ármann Jakobssynir, sem eru bræður Katrínar Jakobsdóttur, formanns VG, misstu sig hreinlega við Össur Skarphéðinsson fyrrum ráðherra og þingmann Samfylkingarinnar.

Svavar telur að einhverjir vonist til að losna við VG úr vinstra litrófi og Ármann segist telja VG vera vinstra litrófið. Össur blandar sér í leikinn og þá fer að hitna í kolunum svo mjög að uppúr sýður. „Engar spælingar drengir. Sjáið bara til þess að á þessari viku sem fer í hönd verði tekið upp samræmt göngulag.“

Tvíburabræðurnir ráðast báðir á Össur

Ármann íslenskufræðingur á erfitt með að leyna gremju sinni og segir hann þessar viðræður hafa verið á rangri braut... „og gott hjá VG að slíta þeim. Vonandi skilja hinir flokkarnir að það verður að finna betri grunn ef það á að mynda hér góða stjórn.“

Össur segir gott að fá það skýrt fram „hjá félaga Ármanni hverjir það voru sem slitu“.

Þetta er meira en Ármann þoldi og segir: „Ekki kalla mig félaga þinn.“ Össur segir þá „Íslands ógæfu verður allt að vopni.“

En, þau verða ekki lokaorð þessa þráðar Svavars. Sagnfræðingurinn Sverrir tekur upp þykkjuna fyrir tvíburabróður sinn, blandar sér óvænt í leikinn og hvæsir á Össur: „Nei ekki allt. Við erum amk. laus við þig af þingi.“

Bræður munu berjast

Óðinn Jónsson útvarpsmaður á RÚV telur þetta allrar athygli vert, hann tók mynd af rimmunni og telur hana standa fyrir sínu sem einþáttung. Sem Óðinn vill kalla „Bræður munu berjast“. Sú mynd ferðast nú um netheima mönnum til furðu, skemmtunar og upplýsingar um ástandið á vinstri væng stjórnmálanna nú um stundir.

„BRÆÐUR MUNU BERJAST.  (Einþáttungur)

Persónur og leikendur:

Gamli leiðtoginn: Svavar Gestsson

Varðmennirnir: Ármann og Sverrir Jakobssynir

Ólátabelgirnir (svikararnir): Mörður Árnason, Össur Skarphéðinsson

Hugsjónapilturinn: Grímur Atlason

Blaðberinn: Hallgrímur Helgason“