Hæstiréttur staðfestir tveggja ára dóm yfir nuddara sem stakk fingri í leggöng konu

Meirihluti Hæstiréttur staðfesti í dag tveggja ára fangelsisdóm yfir reynslumiklum nuddara fyrir að stinga fingur sínum inn í leggöng konu sem sótti nudd til hans.  Nuddarinn, Sverrir Hjaltason, hefur starfað við iðn sína í á þriðja áratug. 

Brotið átti sér stað í júní árið 2012 en konan leitaði til Sverris vegna verkja í mjóbaki. Fyrst gekk nuddið eðlilega fyrir sig þar sem konan lá á maganum og maðurinn nuddaði á henni bakið. Bað hann hana síðar um að afklæðast og bað hana um að fara einnig úr nærbuxunum. Bar hann fyrir sig að hann væri orðinn svo þreyttur í olnbogunum eftir nuddið og nærbuxurnar úr svo stífu efni, sem sært hafi olnbogana. Við nuddið hafi svo fingur hans runnið til og farið inn í leggöng konunnar.

Dómur féll í Héraðsdómi Reykjavíkur í maí síðastliðnum en þar neitaði nuddarinn staðfastlega sök. Var nuddarinn dæmdur til tveggja ára fangelsisvistar. Áfrýjaði ákæruvaldið dómnum til Hæstaréttar og krafðist þess að refsing nuddarans yrði þyngd.

Sjá: Tveggja ára fangelsi: Reynslumikill nuddari stakk fingri í legging konu.

Misræmi í frásögn nuddarans um atvikið

Við skýrslutöku hjá lögreglu skýrði nuddarinn frá því að hönd hans hefði runnið til og „lítill partur af einum puttanum fer inn í klofið á henni“ eins og hann komst að orði og að hann „hefði getað misst alla puttana þarna.“ Við skýrslugjöf bætti hann svo við að hann héldi að hann væri „nokkuð heppinn að hendin fór bara ekki öll inn“.

Frásögn nuddarans um framangreind atriði var við skýrslugjöf fyrir dómi nokkuð á annan veg. Þar kvaðst hann halda að hann hafi ekki runnið til en hann „hafi bara ekki séð þetta nægilega vel, þannig að smávegis af nöglinni snerti sköpin á henni.“

Hafði mikil áhrif á konuna

Eftir að nuddtímanum lauk var konan mjög miður sín og greindi sambýlismanni sínum og vinkonu frá atvikunum.Hún brotnaði saman og leitaði í kjölfarið til sálfræðings en hann greindi hana með áfallastreituröskun sem rekja mætti til atburðarins.

Í skýrslu læknis á neyðarmóttöku sem hitti hana í kjölfar atviksins kom fram að konan hafi verið í losti og fengið grátköst. Hún hafi verið með skjálfta, hroll og vöðvaspennu. Þá hafi hún verið með ógleði og magaverki. 

Var frásögn konunnar á atvikum málsins fyrir dómi talinn trúverðugur.

Klofinn dómur Hæstaréttar

Í dómi meirihluta Hæstaréttar segir að nuddarinn hafi ekki gefið trúverðugar skýringar á því misræmi sem var í frásögn hans við skýrslutöku hjá lögreglu og fyrir dómi. Þá taldi meirihlutinn ekki tilefni til vefengja niðurstöðu Héraðsdóms Reykjavíkur um sakfellingu nuddarans og staðfesti tveggja ára fangelsisdóm yfir honum.

Einn dómari skilaði sératkvæði í málinu en hann taldi að lækka ætti refsingu nuddarans og dæma hann til níu mánaða fangelsisvistar, skilorðsbundið til tveggja ára.

Hér má lesa dóm Hæstaréttar í heild sinni.