Listería fannst í laxasalati Matar og Markar

Matvælastofnun hefur varað við neyslu á laxasalati Matar og Markar vegna listeríu.

Í tilkynningu frá Matvælastofnun segir að við innra eftirlit hjá fyrirtækinu hafi greinst Listeria monocytogenes í laxasalati og hafa allar lotur af laxasalati fyrirtækisins verið innkallaðar í varúðarskyni í samráði við Heilbrigðiseftirlit Norðurlands eystra.

Upplýsingar um vöruna:

• Vöruheiti: Laxalalat
• Framleiðandi: Matur og Mörk
• Nettoþyngd: 200 gr.
• Pökkunardagsetning: Allar pakkningar á markaði 
• Geymsluskilyrði: Kælivara

„Listeria monocytogenes getur orsakað sjúkdóm bæði hjá mönnum og dýrum og kallast þessi sjúkdómur listeriosis. Einkenni sjúkdómsins eru mild flensueinkenni, vöðvaverkir, hiti og stundum ógleði og niðurgangur. Alvarlegri einkenni eru heilahimnubólga í ungbörnum, blóðeitrun og getur sjúkdómurinn einnig valdið fósturláti. Í einstaka tilfellum getur bakterían valdið dauða, þá er yfirleitt um að ræða einstaklinga sem eru með skert ónæmiskerfi. 

Í flestum heilbrigðum einstaklingum veldur neysla á listeríumenguðum matvælum ekki sjúkdómi. Áhættuhópar eru barnshafandi konur, ófædd og nýfædd börn og einstaklingar með skert ónæmiskerfi. Hópsýkingar af völdum listeríu eru mjög sjaldgæfar, oftast er um að ræða einstaklingssýkingar.

Neytendum sem keypt hafa vöruna er bent á að skila henni til fyrirtækisins eða í viðkomandi verslun,“ segir í tilkynningu frá Matvælastofnun.