Hanna Rún vekur gríðarlega athygli í rússneskum fjölmiðlum: „Ég fékk ekki frið“

Bloggfærsla Hönnu Rúnar Bazev Óladóttur um heilbrigðismál í Rússlandi frá því í október vakti gríðarlega athygli í rússneskum miðlum. Í nýjasta tölublaði Newsweek er saga hennar rakin og sagt hvernig bloggfærslan hafi verið kveikjan að því að rússneska þjóðin sé loks að vakna til vitundar um heilbrigðismál í landinu.

Ekki er langt síðan að Vladimír Pútín, forseti landsins, boðaði 33% niðurskurð í heilbrigðismálum, laun í læknastéttinni eru lág og dæmin sem Newseek tekur í frásögn sinni um heilbrigðismál í landinu eru langt frá því að vera eðlileg. 

„Ég eyddi færslunni á sínum tíma því þetta var orðið þannig að ég fékk ekki frið fyrir rússnesku fjölmiðlafólki. Það var endalaust verið að hringja og biðja mig um viðtal,“ segir Hanna en hún og Nikita Bazev, eiginmaður hennar, eru að flytja á ný til Íslands.

Saga hennar var sögð um allt Rússland og þegar ríkissjónvarpið birti söguna tók Hanna færsluna út. „Foreldrar Nikita fengu ekki heldur frið og bróðir hans varð einnig fyrir áreiti. Þá þurfti yfirmaður sjúkrahússins sem ég fór á að svara allskonar erfiðum spurningum um málið og ég veit ekki hvað og hvað,“ segir Hanna Rún.

Umræða í rússneskum miðlum

Mikil umræða var um mál Hönnu Rúnar í rússneskum miðlum og skoðaði hún nokkur ummæli ásamt manni sínum.

„Ég bað hann að þýða nokkur ummæli og sum voru jákvæð og sammála því sem ég hafði sagt. Önnur voru ekki jafn falleg. Það voru margir Rússar búnir að kvarta undan ástandinu en um leið og stelpa frá Evrópu kemur og kvartar þá á loksins að gera eitthvað. Eftir þennan storm fékk ég marga tölvupósta frá fólki sem þakkaði mér fyrir að stíga fram og segja frá þessum aðstæðum. Því ef Rússar gera það gæti það endað illa.“

Hanna bendir á að þýðingin hafi greinilega eitthvað skolast til því hún hafi aldrei sagt að gólfið væri moldargólf og skíturinn væri upp um alla veggi. En aðstaðan hafi ekki verið í lagi og langt frá því að vera boðleg.

„Það voru einhverjir sem sögðu að ég væri bara bitur útlendingur en ég elska Rússland. Maðurinn minn er Rússi og sonur okkar er hálfur Rússi. En þetta var bara ekki í lagi. Hreinlæti og annað skiptir máli þegar maður fer á sjúkrahús. Pabbi minn sagði einmitt að ef sláturhús á Íslandi liti svona út eins og klósettið á spítalanum sem ég fór á yrði því lokað.“

Umfjöllun um Hönnu Rún í Rússlandi hefur breyst á síðustu vikum og samkvæmt Newsweek er eins og Rússland sé að vakna til lífsins.

„Að breyta heilbrigðiskerfinu í landinu, það er ekkert svo slæmt,“ segir hún og brosir. „Ég var svolítið hrædd fyrst því það er ekkert sniðugt að abbast upp á ranga aðila í landinu. En það vita allir af þessu vandamáli og íslenskar konur láta ekki bjóða sér hvað sem er,“ segir Hanna sem er þó þakklát að hafa fengið hjálp frá rússneska kerfinu á sínum tíma.