Vigdís furðar sig á forsetanum

Vigdís Hauksdóttir fráfarandi formaður fjárlaganefndar furðar sig mjög á því að Guðni Th. Jóhannesson forseti íslenska lýðveldisins hafi tjáð sig í kommentakerfum. Guðni sendi frá sér orðsendingu þar sem hann útskýrði meðal annars nánar orð sem féllu á blaðamannafundi á Bessastöðum í gær er snéru að Móður Theresu og stjórnarmyndunarumboði sem hann fól Bjarna Benediktssyni.

Vigdís telur þetta langt fyrir neðan fyrir neðan virðingu forseta Íslands og fær ekki orða bundist:

„Nei - andskotinn - er ekki forseti Íslands mættur í commentakerfið - halló virðing ...!!!" skrifar Vigdís á Facebookvegg sinn nú rétt í þessu og ekki duga færri en þrjú upphrópunarmerki.

Flokkssystir hennar í Framsóknarflokkunum Guðfinna Jóh. Guðmundsdóttir borgarfulltrúi nálgast málið úr annarri átt: „Það er nú svolítið krúttlegt ef hann verður „virkur í athugasemdum“.“

Uppfært 

Upphafleg fyrirsögn þessarar fréttar var “Framsóknarfraukur furða sig á forsetanum”. Þarna hljóp ofstuðlunaráráttan með blaðamanninn í gönur. Samkvæmt Snöru er orðið “frauka” talið niðrandi en aldrei var ætlunin að gera lítið úr þeim Vigdísi og Guðfinnu. Eru þær beðnar afsökunar á mistökunum.

Þá vill Guðfinna ætla að blaðamaður geri henni upp skoðanir með því að telja hana forviða á forsetanum þegar hún talar um að krúttlegt væri ef hann yrði “virkur í athugasemdum”. Þeirri ábendingu Guðfinnu er hér með komið á framfæri. Það er sannarlega ekki undir neinum kringumstæðum stefna Vísis að gera fólki upp skoðanir. Hefur fréttin verið lagfærð að teknu tilliti til þess.